Fransa Milli Assambleyasının birinci vitse-prezidenti Klémans Gette NATO ilə bağlı sərt bəyanatla çıxış edərək ölkəsinin alyansdakı rolunun yenidən qiymətləndirilməsinin vacibliyini bildirib. Onun sözlərinə görə, son beynəlxalq hadisələr Fransanın NATO-da iştirakının məqsədəuyğunluğu ilə bağlı ciddi suallar yaradır.
Redaksiya xəbər verir ki, Klémans Gette bəyanatında ABŞ prezidenti Donald Trampın rəhbərliyi dövründə Vaşinqtonun bir sıra mübahisəli addımlarına diqqət çəkib. O, ABŞ-ın Venesuelada dövlət başçısının oğurlanmasında iştirakı, Fələstində baş verən hadisələrə hərbi dəstək verməsi, Qrenlandiyanı silahlı ilhaqla hədələməsi və beynəlxalq hüququ pozaraq müxtəlif ölkələrə qarşı bombardmanlar həyata keçirməsi ilə bağlı iddialar səsləndirib.
Bəyanatda vurğulanıb ki, NATO faktiki olaraq ABŞ tərəfindən yönləndirilən və əsasən Vaşinqtonun maraqlarına xidmət edən hərbi alyans kimi çıxış edir. Bu kontekstdə Fransanın alyansda qalmasının ölkənin milli maraqlarına nə dərəcədə uyğun olduğu məsələsi daha da aktuallaşıb.
Klémans Gette Fransa Milli Assambleyasına ölkənin NATO-dan çıxışının planlaşdırılması ilə bağlı qətnamə təqdim etdiyini də açıqlayıb. Qətnamə ilkin mərhələdə Fransanın alyansın inteqrasiya olunmuş hərbi komandanlıq strukturundan ayrılmasını nəzərdə tutur.