Çinin iri neft emalı müəssisələri Venesueladan güzəştli xam neft tədarükünün dayanmasından sonra alternativ mənbələr axtarışını sürətləndirib. Mövcud şəraitdə Kanada mənşəli ağır neft Çin bazarı üçün ən yaxın və uyğun əvəzləyici hesab olunur.
Redaksiya Bloomberg-ə istinadla xəbər verir ki, ABŞ prezidenti Donald Tramp administrasiyasının Venesuelaya təzyiqləri sərtləşdirməsi və ölkə rəhbərliyinə qarşı atılan addımlar nəticəsində Çin şirkətləri bu mənbədən faktiki olaraq kənarda qalıb. Bu isə tədarük marşrutlarının yenidən qurulmasına səbəb olub.
Məlumata görə, genişləndirilmiş Trans Mountain boru kəməri vasitəsilə daşınan Kanada nefti əsasən Çin istiqamətinə yönəlib. Bu proses Alberta əyaləti və Kanada federal hökuməti tərəfindən müsbət qarşılanır, çünki onlar enerji ixracında ABŞ-dan asılılığın azaldılmasını strateji məqsəd kimi görürlər.
Analitiklər bildirirlər ki, yeni logistika axını həm Çin üçün tədarük sabitliyi yaradır, həm də Kanada üçün Asiya bazarında mövqelərin möhkəmlənməsinə imkan verir. Bu tendensiyanın yaxın dövrdə davam edəcəyi istisna edilmir.