TikTok ABŞ-də fəaliyyət göstərən əməliyyatlarını Amerika investorlarının nəzarətində olacaq birgə müəssisəyə satmaq barədə razılığa gəlib. Bununla da illərdir davam edən milli təhlükəsizliklə bağlı siyasi və hüquqi qarşıdurma başa çatmış hesab olunur.
Redaksiya Axios-a istinadla xəbər verir ki, yeni yaradılan qurumda Oracle, Silver Lake və Birləşmiş Ərəb Əmirliklərində yerləşən MGX şirkəti birlikdə payların 45 faizinə nəzarət edəcək. Mövcud ByteDance investorlarının əlaqəli strukturları təxminən üçdəbir paya sahib olacaq.
Məlumata görə, TikTok-un sahibi olan ByteDance şirkətinin yeni qurumdakı payı 20 faizə yaxın səviyyədə qalacaq. Bu struktur ABŞ tərəfinin məlumat təhlükəsizliyi və nəzarət tələblərini təmin etmək məqsədi daşıyır.
Razılaşma ABŞ hakimiyyətinin TikTok-un Çinlə mümkün əlaqələri fonunda irəli sürdüyü milli təhlükəsizlik narahatlıqlarının aradan qaldırılmasına yönəlib və platformanın ABŞ bazarında fəaliyyətinin davamını təmin edir.