Elektrikli avtomobil istehsalçısı Tesla-nın 2025-ci ilin ikinci rübündə gəlir və mənfəət göstəriciləri gözləntilərin altında qalıb.
Redaksiya xəbər verir ki, şirkət aprel–iyun dövründə 22,5 milyard dollar gəlir əldə edib. Bu, ötən illə müqayisədə 12 faiz azalma deməkdir. Açıqlanan 40 sentlik səhm başına mənfəət isə illik müqayisədə 23 faiz azalıb.
Analitiklər Tesla-nın Wall Street proqnozlarını qarşılaya bilməməsini, markanın ictimai nüfuzundakı aşınma ilə əlaqələndirirlər. Şirkətin təsisçisi və baş direktoru İlon Maskın Tramp administrasiyası ilə yaxınlığı və sağ yönümlü çıxışları ABŞ ictimaiyyətində ciddi reaksiyalara səbəb olub. Nate Silver-in sorğusuna görə, amerikalıların 58 faizi Mask haqqında mənfi düşünür.
Tesla rəhbərliyi isə gələcəyə ümidlə baxdığını bildirir. Mask investorlarla görüşündə robotaksi layihəsini prioritet hesab etdiyini vurğulayıb. Pilot xidmət hal-hazırda Ostində tətbiq olunur, ilin sonuna qədər ABŞ əhalisinin yarısını əhatə etməsi planlaşdırılır. Bunun üçün Kaliforniya, Arizona və Florida kimi ştatlarda icazələrin alınması əsas şərt olacaq.
Şirkət eyni zamanda öz brend strategiyasını da yeniləyir. Tesla artıq yalnız avtomobil istehsalçısı yox, həm də süni intellekt, robot texnologiyaları və xidmət sektoru üzrə liderliyə iddialıdır. “Tesla Diner” adlı ilk restoran və kino məkanı Kaliforniyada istifadəyə verilib. Hələ təqdim edilməmiş insansı robotlar da maraq doğurur.
Lakin Tesla-nın bu transformasiya cəhdi ciddi təzyiqlərlə müşayiət olunur. ABŞ-ın bir çox bölgəsində “Tesla Takedown” adlı etiraz aksiyaları keçirilir. Autopilot sisteminin təhlükəsizlik aspektləri – xüsusilə dumanlı hava şəraitindəki davranışı – müfəssəl şəkildə araşdırılır.
Tramp rəhbərliyinin tullantı kreditlərini ləğv etməsi və yeni gömrük tarifləri də Tesla-nın maliyyə sabitliyinə təsirsiz ötüşmür. İkinci yarımildə şirkət həm iqtisadi, həm də reputasiya baxımından ciddi sınaqla üz-üzədir.
Fərid Əlizadə