Sudandan çıxarılan qızıl ölkədə döyüşən tərəflərin əsas maliyyə mənbələrindən birinə çevrilib. Məlumata görə, bir il ərzində qızıl ticarətindən əldə olunan 2 milyard dollardan çox vəsait Sudan Silahlı Qüvvələri və Çevik Dəstək Qüvvələrinin müharibə büdcələrinə yönəlib.
Redaksiya xəbər verir ki, təkcə 2024-cü ildə Sudandan təxminən 29 ton qızıl Birləşmiş Ərəb Əmirliklərinə ixrac edilib. Bu ticarətin müharibə iştirakçılarının maliyyə imkanlarını qorumasında mühüm rol oynadığı bildirilir.
Beynəlxalq sanksiyalardan yayınmaq üçün Sudan qızılının Çad və Liviyada mənşəyinin dəyişdirilərək yenidən sənədləşdirildiyi qeyd olunur. Beləliklə, qiymətli metalın Sudan mənşəli olması gizlədilir və onun tənzimlənən beynəlxalq bazarlara çıxışı asanlaşdırılır.
Saxta mənşə sənədləri ilə bazara daxil olan qızıl sanksiyaların təsirini zəiflədir və müharibə tərəflərinin gəlir əldə etməyə davam etməsinə şərait yaradır. Nəticədə qızıl ticarəti Sudandakı silahlı qarşıdurmanın maliyyələşdirilməsini davam etdirən əsas kanallardan biri olaraq qalır.