Səudiyyə Ərəbistanının xam neft ixracı sentyabrda İranla müharibə başlayandan bəri ən yüksək səviyyəyə çatıb. Ölkə zədələnmiş enerji infrastrukturu və Şərq-Qərb boru kəmərindəki problemlərə baxmayaraq, Fars körfəzi terminallarından daşımaları əhəmiyyətli dərəcədə artırıb. Bu barədə Reuters agentliyi məlumat yayıb.
Redaksiya istinadla xəbər verir ki, Səudiyyə Ərəbistanı sentyabrda xam neft ixracını gündə təxminən 5,3 milyon barelə çatdırmağa doğru gedir. Avqustda ixracın kəskin azalmasından sonra Saudi Aramco Ras Tanura kimi şərq terminallarından yükləmələri artırıb.
Hörmüz boğazından keçən Səudiyyə neftinin həcmi də sürətlə yüksəlib. Sentyabrın ikinci yarısında bu marşrutla daşımaların gündə orta hesabla təxminən 2,9 milyon barelə çatdığı bildirilir. Bu göstərici avqustdakı təxminən 700 min barellə müqayisədə bir neçə dəfə çoxdur.
Səudiyyə Ərəbistanı əvvəllər Hörmüz boğazından asılılığı azaltmaq üçün neftin böyük hissəsini Şərq-Qərb boru kəməri vasitəsilə Qırmızı dənizdəki Yanbu terminalına yönəldirdi. Lakin pilotsuz uçuş aparatlarının hücumları nəticəsində kəmərin zədələnməsi Ər-Riyadı Fars körfəzi və Hörmüz marşrutundan daha fəal istifadə etməyə məcbur edib.