Serbiya Prezidenti Aleksandar Vuçiç ikinci və sonuncu səlahiyyət müddətinin başa çatmasına yeddi ay qalmış istefa verdiyini açıqlayıb. Bu barədə Reuters agentliyi məlumat yayıb.
Redaksiya istinadla xəbər verir ki, istefa Vuçiçə hakim Serb Tərəqqi Partiyasının oktyabrın 25-də keçiriləcək növbədənkənar parlament seçkisində qalib gələcəyi təqdirdə baş nazir vəzifəsinə namizəd olmaq imkanı yaradır. Vuçiç istefa verməzdən əvvəl Belqradda tərəfdarları qarşısında çıxış edib.
Serbiya Konstitusiyasına əsasən, parlamentin sədri Ana Brnabiç yeni dövlət başçısı seçilənədək prezident səlahiyyətlərini müvəqqəti icra edəcək. Prezident seçkisinin 90 gün ərzində keçirilməsi tələb olunur. Vuçiç ilk turun dekabrın sonunadək təşkil ediləcəyini bildirib.
Parlament seçkisində hakim partiyanın əsas rəqibləri tələbələrin rəhbərlik etdiyi antikorrupsiya hərəkatı və qərbyönlü müxalifət alyansı olacaq. Etirazlar 2024-cü ildə Novi Sad dəmiryol vağzalında talvarın uçması və 16 nəfərin ölümü ilə nəticələnən hadisədən sonra genişlənib.
Vuçiç istefa günü etirazlarla əlaqədar həbs və ya mühakimə edilən 49 nəfəri əfv etdiyini də açıqlayıb. Onların arasında 12 fəal və hakimiyyət tərəfdarı olan 11 nəfər var.