OpenAI rəhbəri Sem Altman şirkətin indiyədək ən iddialı infrastruktur layihəsini təqdim edib.
Redaksiya xəbər verir ki, Altman şirkətin süni intellekt hesablama gücünü 30 giqavatta çatdırmaq üçün 1,4 trilyon dollarlıq sərmayə planlaşdırdığını bildirib. O, gələcəkdə hər həftə əlavə 1 giqavattlıq hesablama gücü yaratmağı hədəflədiyini qeyd edib. Hazırda hər giqavattın dəyəri 40 milyard dollardan çoxdur. Altman bu xərclərin zamanla yarıbayarı azalacağını desə də, bunun necə baş verəcəyini izah etməyib.
Altman planın reallaşdırılması üçün OpenAI-nin “illik yüz milyardlarla gəlir” əldə etməli olduğunu deyib. Şirkətin bu ilin sonuna qədər 20 milyard dollar illik gəlirə çatması gözlənilir. Bu hədəfin reallaşması üçün OpenAI-nin təxminən 10 dəfə böyüməsi tələb olunur. Plan, Microsoft ilə imzalanmış yeni restrukturizasiya sazişindən sonra açıqlanıb və saziş şirkətin maliyyə toplama məhdudiyyətlərini aradan qaldırır. Altman ilkin kütləvi təklifin (IPO) ən real yol olduğunu bildirib.
Altman yanvarda ABŞ Prezidenti Donald Trampın iştirakı ilə “Stargate” adlı 500 milyard dollarlıq infrastruktur layihəsini təqdim etmişdi. Oracle, SoftBank, Nvidia və CoreWeave şirkətlərinin iştirakı ilə həyata keçirilən layihə əvvəlcə 10 giqavattlıq güc üçün nəzərdə tutulmuşdu, lakin indi bu göstərici üç dəfə artırılıb.
Mütəxəssislər bildirirlər ki, Altmanın planlaşdırdığı miqyas texnologiya tarixində misli görünməmiş səviyyədədir. Hər həftə 1 giqavattlıq gücün yaradılması ildə təxminən 2 trilyon dollarlıq kapital xərci deməkdir. Bu, Amazon, Microsoft, Google və Meta-nın birlikdə 2024-cü ildəki bütün kapital xərclərini beş dəfə üstələyir.
Analitiklər isə xəbərdarlıq edirlər ki, OpenAI-nin bəzi maliyyə əməliyyatları, xüsusilə Nvidia ilə qarşılıqlı investisiya razılaşmaları, şirkətin real gəlir göstəricilərini süni şəkildə artırmış ola bilər. Buna baxmayaraq, Altman iddia edir ki, bu infrastruktur süni intellekt tarixində dönüş nöqtəsi yaradacaq.