İtaliyanın paytaxtı Romada baş verən hadisə, turizmin tarixi abidələrə qarşı hörmətsizliyinin yeni bir nümunəsi kimi gündəmə gəlib. Almaniya vətəndaşı olan 24 yaşlı bir turist, antik Roma dövrünə aid bir əsəri elektrikli skuterlə daşıyarkən polis tərəfindən saxlanılıb.
Redaksiya məlumat verir ki, hadisə ABŞ səfirliyinə yaxın, tarixi Via Veneto küçəsində baş verib. Polis, gəncin skuterin ayaq hissəsində təxminən 30 kiloqram ağırlığında mərmər sütun kaidesi daşıdığını görüb və onu izləməyə başlayıb. Saxlanılan turist, əsəri "xatirə" kimi götürdüyünü bildirib, lakin əsərin haradan əldə edildiyi və satın alınıb-alınmadığı hələ də məlum deyil. Roma Arxeologiya İdarəsi, sözügedən mərmər parçasının tarixi əhəmiyyətə malik bir Roma əsəri olduğunu açıqlayıb.
Hazırda turistə qarşı hər hansı bir ittiham irəli sürülməsə də, "oğurlanmış mədəni sərvətləri saxlamaq" ittihamı ilə araşdırma başlanılıb. İtaliya hakimiyyəti, son illərdə turistlərin qeyri-adekvat davranışlarının artmasından narahatdır. Daha əvvəl də turistlər İspan turist pilləkənlərindən skuterlə və Maserati markalı avtomobillərlə enmiş, Pompey antik şəhərində motosiklet sürmüş və ya Kolizeyin divarlarına adlarını yazmışdılar. Fevral ayında Yeni Zelandiyalı bir turist Trevi çeşməsinə tullanaraq cərimə olunmuş, bu ayın əvvəlində isə bir amerikalı turist Roma Kolizeyinin ətrafındakı hasarı keçməyə çalışarkən zədələnmişdi.
İtaliya rəsmiləri, Roma şəhərinin tarixi toxumasına zərər verən bu cür hərəkətlərə qarşı daha sərt nəzarət tədbirləri görüləcəyini bildirirlər. Bu hadisə, turizm sektorunda mədəni irsə hörmətin və qorunmanın vacibliyini bir daha gündəmə gətirir.
Sevinc Kərimova