Kremlin rəhbərliyinin yaydığı məlumata görə, Rusiya Prezidenti Vladimir Putin Venesuela Prezidenti Nikolas Maduro ilə telefon danışığı aparıb. Tərəflər regional vəziyyəti və ikitərəfli əməkdaşlıq məsələlərini müzakirə ediblər.
Redaksiya xəbər verir ki, Putin söhbət zamanı Venesuela xalqı ilə həmrəyliyini ifadə edib və xarici təzyiqlərin artdığı şəraitdə Maduro hökumətinin milli maraqları və suverenliyi müdafiə etmək üçün atdığı addımları dəstəklədiyini bildirib.
Telefon danışığında həmçinin enerji, iqtisadi əməkdaşlıq və təhlükəsizlik sahələrində birgə fəaliyyət imkanlarının genişləndirilməsi məsələləri diqqət mərkəzində olub. Kremlin bəyanatına görə, tərəflər gələcək təmasların davam etdirilməsi barədə razılığa gəliblər.
Müşahidəçilər hesab edirlər ki, Moskvanın bu mövqeyi Venesuelaya qarşı beynəlxalq təzyiqlərin artdığı dövrdə siyasi dəstəyin nümayişi kimi qiymətləndirilir.