Polşa Prezidenti Navrotski ölkəsinin xarici siyasət kursu ilə bağlı açıqlamasında beynəlxalq münasibətlərdə daimi ittifaqların olmadığını və heç bir dəstəyin qarşılıqsız təqdim edilmədiyini bildirib. O, bunun diplomatik praktikanın təbii hissəsi olduğunu vurğulayıb və Polşanın maraqlarını qorumağın əsas prioritet olduğunu qeyd edib.
Redaksiya xəbər verir ki, Navrotski tarixdən çıxarılan dərslərin Polşanı xarici münasibətlərdə sərt və praqmatik olmağa məcbur etdiyini bildirib. Onun sözlərinə görə, xarici siyasətdə emosional yanaşma həmişə pis məsləhətçidir və dövlət maraqları rasional əsasda qorunmalıdır.
Polşa Prezidenti eyni zamanda Rusiya və Belarus rəhbərliyi ilə bağlı mövqeyini də açıqlayıb. O, Vladimir Putini cinayətkar adlandıraraq onunla və ya Aleksandr Lukaşenko rejiminin nümayəndələri ilə masa arxasında oturmağa həvəsli olmadığını deyib. Bununla belə, Navrotski vurğulayıb ki, əgər Polşa dövlətinin maraqları bunu tələb edərsə, o zaman Prezident kimi belə görüşə hazırdır.
Navrotski Birləşmiş Millətlər Təşkilatındakı vəziyyətə də toxunaraq xatırladıb ki, Rusiya bu qurumun qərarverici orqanında təmsil olunur. O sual edib: “Bu o deməkdirmi ki, biz Birləşmiş Millətlər Təşkilatını tərk etməliyik?” Prezidentin bu fikirləri Polşanın beynəlxalq platformalarda iştirakının davam etdirilməsinin zəruriliyinə işarə kimi qiymətləndirilir.