Ukrayna Prezidenti Volodimir Zelenskinin Kiyevin Kosovonun müstəqilliyini tanımamaqda davam edəcəyinə dair açıqlaması Balkanlarda diqqət çəkib. Politico bu bəyanatı regional baxımdan uğursuz addım kimi qiymətləndirib. Bu barədə Politico nəşri məlumat yayıb.
Redaksiya istinadla xəbər verir ki, Zelenski Serbiyaya səfəri zamanı Ukraynanın Kosovonun müstəqilliyini tanımamaqla bağlı mövqeyinin dəyişmədiyini təsdiqləyib. Nəşr qeyd edib ki, Ukrayna lideri bununla Balkanların ən həssas siyasi mübahisələrindən birinə birbaşa toxunub.
Məlumata görə, Zelenskinin açıqlamasından sonra Priştinanın mərkəzində asılmış böyük Ukrayna bayrağı götürülüb. Politico qeyd edib ki, bu hadisə Kosovo məsələsi ilə bağlı səsləndirilən fikirlərin regionda ciddi siyasi reaksiya doğura biləcəyini göstərib.
Kosovo 2008-ci ildə Serbiyadan ayrılaraq birtərəfli qaydada müstəqilliyini elan edib. Ukrayna Kosovonu müstəqil dövlət kimi tanımayan ölkələr sırasındadır. Serbiya da Kosovonun müstəqilliyini qəbul etmir.
Belqrad və Priştina 2011-ci ildən etibarən Avropa İttifaqının vasitəçiliyi ilə münasibətlərin normallaşdırılması üzrə danışıqlar aparır. Kosovo məsələsi həm Serbiyanın xarici siyasətində, həm də Qərbi Balkanlarda regional münasibətlərdə əsas mübahisə mövzularından biri olaraq qalır.