Nvidia Britaniyanın Ineffable Intelligence adlı süni intellekt, yəni Sİ startapı ilə yeni nəsil model təlimi infrastrukturu qurmaq üçün əməkdaşlığa başlayıb.
Redaksiya xəbər verir ki, tərəflər təcrübə, sınaq və səhv prinsipi ilə öyrənən Sİ sistemləri üzərində birgə işləyəcəklər. Layihə klassik insan məlumatları üzərində öyrədilən modellərdən fərqli olaraq, təkrarlanan təcrübələrdən nəticə çıxaran sistemlərin inkişafına yönəlib.
Londonda yerləşən Ineffable Intelligence ötən ilin sonunda Google DeepMind-in tanınmış mütəxəssisi Devid Silver tərəfindən yaradılıb. Şirkət bir neçə həftə əvvəl gizli rejimdən çıxıb və aprel ayında Avropada indiyədək ən böyük seed raund sayılan 1,1 milyard dollarlıq maliyyələşmə cəlb edib.
Nvidia bu maliyyələşmədə Google, Sequoia Capital və Böyük Britaniyanın Sovereign AI Fund fondu ilə birlikdə iştirak edib. Əməkdaşlıq çərçivəsində Nvidia layihəyə Grace Blackwell çipləri və Vera Rubin platforması ilə dəstək verəcək.
Nvidia rəhbəri Censen Huan bildirib ki, Sİ-nin növbəti mərhələsi davamlı şəkildə təcrübədən öyrənən “superöyrənən” sistemlər olacaq. Devid Silver isə hesab edir ki, artıq insanların bildiklərini öyrənən sistemlərdən yeni bilik kəşf edə bilən sistemlərə keçid lazımdır.
Bu əməkdaşlıq Nvidia-nın Avropada Sİ ekosisteminə yatırımlarını genişləndirməsinin növbəti mərhələsi hesab olunur. Şirkət son dövrlərdə Mistral və Nscale kimi Avropa Sİ və data infrastrukturu şirkətlərinə də dəstək verib.