İsrailin baş naziri Benyamin Netanyahu Sky News-a müsahibəsində Avstraliya hökumətinə və Qərb ölkələrinə sərt çağırışlarla müraciət edib. O, Fələstin dövlətinin tanınmasını dəstəkləyən addımların HƏMAS-a dolayı mükafat kimi təqdim edildiyini iddia edib və bunun təhlükəli mesaj verdiyini bildirib.
Redaksiya xəbər verir ki, Netanyahu oktyabrın yeddincisindən sonra Fələstin dövlətini tanıyan və bu istiqamətdə çağırış edən hökumətlərin HƏMAS-ı təşviq etdiyini deyib. Onun sözlərinə görə, bu yanaşma “yəhudiləri öldürün, mükafat alın” kimi anlaşılır və terrorizmlə mübarizəyə zərbə vurur.
Netanyahu Bondi Beach hadisəsinə də toxunaraq bildirib ki, həmin ərazidə silahlı mühafizəçilər olsaydı, hücumun qarşısını almaq mümkün olardı. O, təhlükəsizliyin gücləndirilməsinin hazırkı şəraitdə zəruri olduğunu vurğulayıb.
Müsahibədə baş nazir antisemitizmi təhlükəli xəstəlik adlandırıb və onun təkcə yəhudilərlə məhdudlaşmadığını deyib. Netanyahu “nifrət yürüşləri”nin cəmiyyətləri məhv etdiyini, bunun Avstraliyaya və ümumi sivilizasiyaya qarşı yönəldiyini iddia edib.
Netanyahu Hanukka bayramının tarixi mənasına da toxunaraq Makkabilər üsyanının yəhudi və xristian sivilizasiyasının formalaşmasında rol oynadığını bildirib. O, Avstraliyanı terrorizmə və “sivilizasiyanın düşmənlərinə” qarşı birgə mübarizəyə çağıraraq, qüvvələrin birləşdirilməsi halında qələbəyə şübhə etmədiyini qeyd edib.