Amerikalı milyarder, SpaceX və Tesla şirkətlərinin rəhbəri İlon Mask ABŞ-dan köçmək niyyətində olmadığını bildirib. O, həyatının sonuna qədər ABŞ-da qalmaq istədiyini, yalnız Marsa getmək ehtimalını istisna etmədiyini açıqlayıb.
Redaksiya məlumat verir ki, Mask gələcək yaşayış yeri ilə bağlı fikirlərini bölüşərkən ABŞ-a bağlılığını vurğulayıb. O, Marsın da gələcəkdə ABŞ-ın bir hissəsi ola biləcəyini söyləyib.
“Mən ABŞ-da öləcəyəm. Heç yerə getməyəcəyəm. Ola bilsin, Marsa gedim, amma Mars da ABŞ-ın bir hissəsi olacaq”, – deyə İlon Mask bildirib.
Qeyd edək ki, Maskın rəhbərlik etdiyi SpaceX şirkətinin əsas uzunmüddətli hədəflərindən biri insanların Marsa göndərilməsi və orada daimi yaşayış məntəqələrinin yaradılmasıdır.
Şirkət bu məqsədlə Starship kosmik nəqliyyat sistemini inkişaf etdirir. Layihə gələcəkdə insanların və böyük həcmdə yüklərin Marsa daşınmasını nəzərdə tutur.
Bununla belə, Maskın Marsın ABŞ-ın bir hissəsi olacağı barədə sözləri şəxsi mövqeyini əks etdirir. Marsın hər hansı dövlətin ərazisinə çevrilməsi beynəlxalq kosmik hüquq baxımından ayrıca məsələdir.
1967-ci il Kosmos Müqaviləsinə əsasən, Ay və digər göy cisimləri də daxil olmaqla kosmik fəza dövlətlərin suverenlik iddiası yolu ilə mənimsənilməsinə açıq deyil.