Parisdə yerləşən Luvr (Louvre) muzeyindən 88 milyon avro dəyərində kral zinət əşyalarının oğurlanması ilə bağlı istintaq davam etdirilir və saxlanılan şəxslərdən birinin tanınmış keçmiş YouTuber olması ölkədə böyük rezonans doğurub.
Redaksiya xəbər verir ki, oktyabrın 19-da muzeyin məşhur Apollon qalereyasından səkkiz ədəd kral cövhərinin oğurlandığı müəyyən olunub. Hadisə zamanı təhlükəsizlik siqnallarının işə düşməməsi və nəzarət sisteminin fasiləsiz olmasına baxmayaraq əşyaların izsiz yoxa çıxması istintaqın diqqətini oğurluğun peşəkar şəkildə planlaşdırıldığı ehtimalına yönəldib.
Saxlanılan şübhəlilərdən biri — internetdə "Doudou Cross Bitume" adı ilə tanınan 39 yaşlı Abdullay — əvvəllər motosiklet akrobatikası və idman məzmunlu videolarla populyarlıq qazanmış, lakin keçmişdə müxtəlif cinayət faktlarına görə bir neçə dəfə həbs olunmuş şəxsdir. O, ifadəsində oğurluğu “bir qrup cinayət təşkilatçısının göstərişi ilə” həyata keçirdiyini bildirib və günahını qismən etiraf edib.
Hadisə ilə bağlı digər şübhəlilərin ifadələri isə istintaqda təəccüb doğurub. Onlardan biri Louvre muzeyinin yalnız şüşə piramidadan ibarət olduğunu zənn etdiyini, digəri isə muzeyin bazar günləri bağlı olduğunu düşündüyünü deyib. Bu cür açıqlamalar polis tərəfindən gerçək vəziyyətin gizlədilməsi və ya hadisənin təşkilatçılarını qorumaq cəhdi kimi qiymətləndirilir.
Fransa hüquq-mühafizə orqanları hadisənin sadə oğurluq deyil, yüksək hazırlıqlı, yaxşı maliyyələşdirilmiş və peşəkar şəkildə təşkil olunmuş cinayət qruplaşmasının işi ola biləcəyini istisna etmir. Oğurlanan zinət əşyalarının isə ölkə xaricinə çıxarılmadan əvvəl ayrı-ayrı vasitəçilər vasitəsilə satılmaq üçün parçalanması ehtimalı araşdırılır.
İstintaq davam edir, saxlanılanların sayı və təşkilatçıların kimliyi ilə bağlı rəsmi açıqlamalar verilmir.