Kolumbiyada baş verən 7,4 bal gücündə zəlzələ nəticəsində ölənlərin sayının 132-yə, yaralananların sayının isə 570-ə çatdığı bildirilir. Yerli media daha yüksək itki rəqəmləri açıqlasa da, beynəlxalq agentliklərin son təsdiqlənmiş məlumatlarında ən azı 111 nəfərin ölümü qeyd olunur. Bu barədə Reuters məlumat yayıb.
Redaksiya istinadla xəbər verir ki, güclü yeraltı təkanlar ölkənin qərb bölgələrində genişmiqyaslı dağıntılara səbəb olub. İlkin məlumatlara əsasən, 1575-dən çox yaşayış evi və digər tikililər zərər görüb, 61 bina isə tamamilə dağılıb. AP ümumilikdə 1600-dən çox binanın zədələndiyini və ya dağıldığını bildirib.
Zəlzələnin episentri Çoko bölgəsindəki San Xose del Palmar yaxınlığında qeydə alınıb. Kali, Pereira, Kibdo və Manisales şəhərləri ən çox zərər çəkən ərazilər sırasındadır. Dağıntılar altında insanların qala biləcəyi ehtimalına görə xilasedicilər, hərbçilər və könüllülər axtarış-xilasetmə əməliyyatlarını davam etdirirlər.
Bölgədə ardıcıl afterşoklar da qeydə alınır. Reuters-in məlumatına görə, əsas zəlzələdən sonra ən azı 21 yeraltı təkan baş verib. Hakimiyyət sakinləri zədələnmiş binalardan uzaq durmağa və fövqəladə xidmətlərin göstərişlərinə əməl etməyə çağırıb.