İsveçrənin Sürix şəhərində keçirilən etiraz aksiyası kütləvi iğtişaşlara çevrilib. Nümayişçilər küçələrdə barrikadalar quraraq onları yandırıb, avtomobillərə və ictimai infrastruktura ziyan vurub, polis əməkdaşlarına hücum ediblər. Hüquq-mühafizə orqanları etirazçılara qarşı su şırnaqları, gözyaşardıcı vasitələr və rezin güllələrdən istifadə edib. Bu barədə İsveçrənin “20 Minuten” nəşri və Sürix şəhər polisi məlumat yayıb.
Redaksiya mənbələrə istinadən xəbər verir ki, hadisələr oktyabrın 31-dən noyabrın 1-nə keçən gecə Sürixin Langştrasse və Helvetiaplatz ərazilərində baş verib. Bir neçə yüz nəfər icazəsiz nümayişə qoşulub. Etirazçılar arasında üzlərini gizlədən və Hellouin kostyumları geyinən şəxslər də olub.
Polisin məlumatına görə, nümayişçilər küçələrdəki zibil konteynerlərini yola çıxararaq yandırıblar. Daha sonra müxtəlif qruplara bölünən etirazçılar elektrik velosipedlərini, skuterləri və bir avtomobili də yandırıblar.
İğtişaşlar zamanı mağazaların vitrinləri və ictimai nəqliyyat dayanacaqlarının şüşələri sındırılıb. Polis əməkdaşlarına daş, şüşə butulka və pirotexniki vasitələr atılıb.
Hüquq-mühafizə orqanları vəziyyəti nəzarətə almaq üçün əraziyə əlavə qüvvələr cəlb edib. Qarşıdurmalar zamanı su şırnaqlarından, qıcıqlandırıcı kimyəvi vasitələrdən və rezin güllələrdən istifadə olunub.
Hadisələr Hellouin bayramını qeyd etmək üçün küçələrə çıxan sakinlərə də təsir göstərib. Nümayişçilər və polis arasında baş verən qarşıdurmalar ərazidəki digər insanların təhlükəsizliyi üçün risk yaradıb.
Ən ciddi insidentlərdən biri polis əməkdaşlarının yaralanmış yeniyetməyə yardım göstərməyə çalışdığı zaman baş verib. Sürix polisinin açıqlamasına əsasən, Brauerştrasse küçəsində tibbi yardım tələb edən hadisəyə göndərilmiş patrul avtomobili kütlənin hücumuna məruz qalıb.
Polis avtomobilinə ziyan dəyib və əməkdaşlar geri çəkilməyə məcbur olublar. Nəticədə qəza zamanı ayağından ciddi xəsarət almış yeniyetməyə yardım göstərilməsi çətinləşib.
Yerli hakimiyyətin məlumatına görə, gecə saatlarında vəziyyət tədricən sakitləşib. Hadisələr nəticəsində dəymiş maddi ziyanın ümumi məbləği hələ müəyyənləşdirilməyib. Polis araşdırmaya başlayıb.
Nümayişlərə çağırışlar daha əvvəl sosial şəbəkələrdə və radikal solçu qruplarla əlaqələndirilən internet platformalarında yayılıb.
Təşkilatçılar Qəzza zolağındakı müharibəyə, polis fəaliyyətinə və ifrat sağçı ideologiyaların güclənməsinə etiraz etdiklərini bildiriblər. Aksiyalar Avropanın digər ölkələrində keçirilən gənclər nümayişləri ilə də əlaqələndirilib.
Sürixlə yanaşı, İsveçrənin Bazel şəhərində də icazəsiz etiraz aksiyası keçirilib. Təxminən 150 nəfərin iştirak etdiyi nümayiş zamanı barrikadalar yandırılıb, bəzi obyektlərə ziyan dəyib və nəqliyyatın hərəkəti müvəqqəti məhdudlaşdırılıb.
İsveçrə hüquq-mühafizə orqanları baş verən hadisələrlə bağlı araşdırmaları davam etdirir.