Dünya bazarında neftin qiyməti 1 faizdən çox azalıb. Brent markalı neft 1,4 faiz, ABŞ-ın West Texas Intermediate (WTI) markalı nefti isə 1,5 faiz ucuzlaşıb. Qiymətlərin enməsi İran və Qətər rəsmilərinin ABŞ və İsrailin İranla müharibəsinin dayandırılmasına yönəlmiş danışıqları davam etdirməsi fonunda baş verib.
Redaksiya xəbər verir ki, İran və Qətər nümayəndələri münaqişənin diplomatik yollarla həlli məqsədilə ardıcıl üçüncü gündür danışıqlar aparırlar. Bu təmaslar investorlar arasında regionda hərbi gərginliyin azala biləcəyinə dair müəyyən ümidlər yaradıb.
KCM Trade şirkətinin baş bazar analitiki Tim Uoterer bildirib ki, diplomatik irəliləyiş ehtimalı və həftəsonu hərbi qarşıdurmanın ciddi şəkildə genişlənməməsi neft bazarındakı təzyiqi müvəqqəti zəiflədib.
“Diplomatik sahədə müəyyən irəliləyişə dair ümidlərin davam etməsi, eləcə də həftəsonu hərbi gərginliyin əhəmiyyətli dərəcədə artmaması hələlik qiymətlər üzərindəki təzyiqi müəyyən qədər azaldıb”, – deyə analitik vurğulayıb.
Bununla belə, neft bazarında qeyri-müəyyənlik qalmaqdadır. İnvestorlar Yaxın Şərqdə hərbi əməliyyatların yenidən intensivləşməsi ehtimalını diqqətlə izləyirlər.
Xüsusilə ABŞ-da Konqresə aralıq seçkilərdən sonra regionda qarşıdurmanın genişlənə biləcəyi ilə bağlı narahatlıqlar mövcuddur. Belə bir ssenarinin reallaşması neft qiymətlərinə yenidən yüksəldici təsir göstərə bilər.
Hazırda bazarın istiqaməti əsasən diplomatik danışıqların nəticələrindən və bölgədə hərbi vəziyyətin necə inkişaf edəcəyindən asılıdır.