İranın xarici işlər naziri Abbas Əraqçi ABŞ iqtisadiyyatının müharibə səbəbindən üzləşdiyi mənfi nəticələrin qarşısının alına biləcəyini bildirib. Bu haqda IRNA məlumat verib.
Redaksiya istinadla xəbər verir ki, Əraqçi X hesabında amerikalıların “İrana qarşı seçim müharibəsinin sürətlə artan xərclərini” ödəməyə məcbur edildiyini yazıb. O bildirib ki, yanacaq qiymətlərində artım və fond bazarında risklər problemin yalnız bir hissəsidir.
İranlı nazirin sözlərinə görə, əsas ağrı ABŞ dövlət borcu və ipoteka faizləri yüksəlməyə başlayanda hiss olunacaq. Əraqçi avtomobil kreditləri üzrə gecikmələrin artıq 30 ildən çox müddətdə ən yüksək səviyyəyə çatdığını qeyd edib.
O, bütün bu iqtisadi nəticələrin qarşısının alına biləcəyini vurğulayıb. Əraqçinin açıqlaması Tehran və Vaşinqton arasında müharibə, enerji qiymətləri, sanksiyalar və Hörmüz boğazı ilə bağlı gərginliyin davam etdiyi bir dövrdə səslənib.
IRNA-nın məlumatında İran tərəfi ABŞ və İsraili fevralın 28-də İrana qarşı genişmiqyaslı hücuma başlamaqda ittiham edir. Tehran bu hücumlara cavab olaraq regiondakı ABŞ və İsrail mövqelərinə zərbələr endirdiyini bildirir.
Məlumata görə, Pakistanın vasitəçiliyi ilə atəşkəs və danışıqlar üçün Islamabad formatı gündəmə gəlib. İran tərəfi danışıqlar üçün ABŞ qüvvələrinin regiondan çıxarılması, sanksiyaların ləğvi və Hörmüz boğazı üzərində nəzarət mexanizmləri daxil olmaqla 10 bəndlik plan təklif etdiyini açıqlayıb.
İranın Ali Milli Təhlükəsizlik Şurası aprelin 8-də müharibənin Tehran üçün “tarixi qələbə” ilə nəticələndiyini və ABŞ-ı danışıqları qəbul etməyə məcbur etdiyini bildirib. Vaşinqton isə İranla bağlı siyasətini İsrail və Körfəz ölkələrinin təhlükəsizliyi ilə əsaslandırır.