İlon Mask Ayda fabriklər qurmaq, süni intellekt peykləri istehsal etmək və onları dərin kosmosa göndərmək üçün “mass driver” sistemi yaratmaq istədiyini bildirib. Onun sözlərinə görə, yüksək miqyaslı enerji və kosmik sənaye istehsalına çıxmaq üçün Ay əsas platformaya çevrilə bilər.
Redaksiya məlumat verir ki, Mask bəşəriyyətin illik bir teravattdan artıq istehsal səviyyəsinə çatmaq istədiyi halda Ay istiqamətində hərəkət etməsinin vacib olduğunu deyib. O bildirib ki, Ayda zavodlar yaradılarsa, burada süni intellekt peykləri istehsal etmək və onları xüsusi buraxılış sistemi ilə dərin kosmosa göndərmək mümkün olacaq.
Maskın sözlərinə görə, elmi fantastikada təsvir olunan bu sistem real layihəyə çevrilə bilər. O hesab edir ki, belə infrastruktur vasitəsilə gələcəkdə illik minlərlə qiqavat həcmində istehsal səviyyəsinə çıxmaq və günəş enerjisinin daha böyük hissəsindən istifadə etmək mümkün olacaq.
Amerikalı milyarder həmçinin əvvəlcə Ayda, daha sonra Marsda özünü təmin edən şəhərlər qurmaq istədiyini vurğulayıb. Onun fikrincə, uzunmüddətli məqsəd bəşəriyyətin bütün Günəş sistemi boyunca mərhələli şəkildə yayılmasıdır. Mask əlavə edib ki, bu yol gələcəkdə yad həyat formaları və ya milyon illər əvvəl mövcud olmuş sivilizasiyaların izləri ilə qarşılaşmaq ehtimalını da gündəmdə saxlaya bilər.