Çin Yəməndəki husilər üçün getdikcə daha mühüm təchizat mənbəyinə çevrilir. Çin şirkətlərinin mülki və hərbi məqsədlərlə istifadə oluna bilən ikili təyinatlı məhsullar, xüsusilə də pilotsuz uçuş aparatlarının istehsalı üçün vacib komponentlər göndərdiyi bildirilir. Bu barədə The Wall Street Journal məlumat yayıb.
Redaksiya istinadla xəbər verir ki, BMT hesabatları və silah ekspertlərinin məlumatlarına əsasən, son illərdə husilər üçün nəzərdə tutulduğu ehtimal edilən və ələ keçirilən hərbi təyinatlı məhsulların əhəmiyyətli hissəsinin mənşə ölkəsi Çin olub. 2021-2025-ci illərdə ələ keçirilmiş belə məhsulların təxminən 35 faizinin Çindən gəldiyi, əvvəlki dövrdə isə bu göstəricinin təxminən 5 faiz olduğu bildirilir.
Məlumata görə, Çin şirkətləri husilərə əsasən dron komponentləri, rabitə avadanlıqları və digər ikili təyinatlı texnologiyalar təqdim edir. Bu, qruplaşmaya İranla yanaşı əlavə təchizat kanalı yaradır. İran isə uzun illər ərzində husilərə raket və dron komponentləri, silahlar və təlim dəstəyi verən əsas tərəf olaraq qalır.
Husilər təchizat üçün Cibuti və Somali istiqamətlərindən də istifadə ediblər. Silah ekspertləri qruplaşmanın qlobal kommersiya və qeyri-rəsmi təchizat zəncirlərindən istifadə etməklə bəzi sistemlərin yerli istehsalını genişləndirdiyini bildirirlər. Bununla belə, İran texnologiyası husilərin arsenalının əsasını təşkil etməyə davam edir.
Çin rəsmiləri silah embarqolarına və ixrac nəzarəti qaydalarına əməl etdiklərini bildirirlər. The Wall Street Journal-ın məlumatında isə bəzi ekspertlər Çin mənşəli ikili təyinatlı məhsulların husilərin dron imkanlarının saxlanılması və genişləndirilməsində rolunun artdığı qənaətindədirlər.