Yəməndə fəaliyyət göstərən husilərin hərbi sözçüsü Yəhya Səri Səudiyyə Ərəbistanının bir sıra strateji obyektlərinə raket və pilotsuz uçuş aparatları ilə hücumlar həyata keçirdiklərini açıqlayıb. Onun sözlərinə görə, hücumların hədəfləri arasında Abqaiq şəhərindəki Saudi Aramco neft obyektləri, Ər-Riyaddakı Kral Xalid Beynəlxalq Hava Limanı, neft anbarları və maliyyə mərkəzi yer alıb.
Redaksiya mənbəyə istinadən xəbər verir ki, husilərin noyabrın 8-də yaydıqları bəyanatda Səudiyyə Ərəbistanının enerji və nəqliyyat infrastrukturuna qarşı bir neçə hərbi əməliyyat keçirdikləri bildirilib.
Husilərin hərbi sözçüsü hücumlarda ballistik və qanadlı raketlərdən, həmçinin pilotsuz uçuş aparatlarından istifadə olunduğunu iddia edib.
Səri bildirib ki, əməliyyatların əsas hədəflərindən biri Səudiyyə Ərəbistanının dövlət neft şirkəti Saudi Aramco-ya məxsus obyektlər olub.
Bundan başqa, Ər-Riyaddakı Kral Xalid Beynəlxalq Hava Limanının və paytaxtın maliyyə mərkəzinin də hədəfə alındığı açıqlanıb.
Husilər hücumların Səudiyyə Ərəbistanının Yəməndə həyata keçirdiyi hərbi əməliyyatlara cavab olduğunu bildiriblər.
Səudiyyə Ərəbistanı rəsmiləri isə paytaxt və ölkənin şərq bölgələrinə yönələn raketlərin hava hücumundan müdafiə sistemləri tərəfindən zərərsizləşdirildiyini açıqlayıblar.
Səudiyyə Ərəbistanının Energetika Nazirliyinin məlumatına görə, hücum cəhdi zamanı düşən raket qəlpələri Ər-Riyadın Kral Abdullah Maliyyə Rayonunda yerləşən Aramco binasına ziyan vurub.
Binanın bir neçə mərtəbəsində pəncərələrin sındığı bildirilib. Nazirlik hadisə nəticəsində ölən və yaralananların olmadığını açıqlayıb.
Bununla belə, Səudiyyə Ərəbistanı hakimiyyəti Kral Xalid Beynəlxalq Hava Limanının birbaşa vurulduğunu təsdiqləməyib.
Husilərin Abqaiq şəhərindəki neft obyektlərinə və digər hədəflərə uğurlu zərbələr endirdiklərinə dair bütün iddiaları da müstəqil şəkildə təsdiqlənməyib.
Qeyd edək ki, Səudiyyə Ərəbistanı ilə husilər arasında hərbi qarşıdurma son aylarda yenidən intensivləşib. Tərəflər qarşılıqlı raket və hava hücumları həyata keçirməkdə davam edirlər.
Regiondakı gərginlik enerji infrastrukturunun təhlükəsizliyi və beynəlxalq neft təchizatının davamlılığı ilə bağlı narahatlıqları artırır.