Google şirkəti Gemini süni intellekt sistemi üçün Personal Intelligence adlı yeni funksiyanı istifadəyə verib. Bu funksiya Gmail, Google Photos, YouTube və axtarış tarixçəsi ilə inteqrasiya olunaraq cavabların daha fərdiləşdirilmiş şəkildə təqdim edilməsini təmin edir.
Redaksiya xəbər verir ki, Personal Intelligence funksiyası avtomatik aktiv edilmir və yalnız AI Pro və ya AI Ultra abunəliyi olan istifadəçilər tərəfindən könüllü şəkildə qoşula bilər. İstifadəçilər hansı tətbiqlərin Gemini ilə əlaqələndiriləcəyini ayrıca seçmək imkanına malikdirlər.
Yeni imkanlar sayəsində Gemini istifadəçinin əvvəlki səyahətləri, çəkdiyi fotolar və axtarış vərdişləri əsasında tövsiyələr verə bilir. Google-un açıqlamasına görə, sistem müxtəlif məlumat mənbələrini birgə təhlil edərək daha kontekstual cavablar formalaşdırır.
Gemini üzrə vitse-prezident Coş Vudvardın sözlərinə görə, sistem real vaxtda şəxsi məlumatlardan istifadə edərək praktiki problemlərin həllini asanlaşdırır. Google bildirir ki, bu məlumatlar süni intellekt modellərinin təlimi üçün istifadə olunmur və istifadəçilər istənilən vaxt məlumatları silə və ya tətbiqlərlə əlaqəni kəsə bilərlər.
Şirkət bu addımla fərdiləşdirilmiş süni intellektin ümumi cavablardan daha üstün olacağına mərc edir. Bununla yanaşı, mütəxəssislər şəxsi məlumatların istifadəsi ilə bağlı məxfilik risklərinin qalmaqda davam etdiyini və istifadəçilərin ayarları diqqətlə yoxlamalı olduqlarını vurğulayırlar.