Rusiyanın Federal Təhlükəsizlik Xidməti (FSB) Ukrayna xüsusi xidmət orqanlarını partlayıcı qurğular yerləşdirilmiş FPV dron idarəetmə eynəkləri vasitəsilə bir sıra terror aktları hazırlamaqda ittiham edib. Qurumun məlumatına görə, Rusiyanın müxtəlif bölgələrində belə cihazlardan ibarət partiya müsadirə olunub.
Redaksiya mənbəyə istinadən xəbər verir ki, FSB-nin açıqlamasına əsasən, şübhəli cihazlardan biri Volqoqrad vilayətində hərbçiyə könüllü tərəfindən təqdim edildikdən sonra yoxlama zamanı aşkarlanıb.
Rusiya xüsusi xidmət orqanının iddiasına görə, eynəklərin soyutma sistemində dəyişiklik edilərək partlayıcı qurğular gizlədilib. Bildirilir ki, həmin qurğuların cihazlar işə salındıqda partlaması nəzərdə tutulub.
FSB iddia edir ki, Ukrayna xüsusi xidmət orqanlarının əməkdaşları Rusiyadakı könüllü təşkilatlarla anonim şəkildə əlaqə saxlayıblar. Partlayıcı qurğuların yerləşdirildiyi bildirilən eynəklər isə “Rusiya Poçtu” vasitəsilə göndərilərək Ukraynadakı müharibədə iştirak edən hərbçilərə çatdırılmaq üçün nəzərdə tutulub.
Qurumun məlumatına əsasən, Rusiyanın müxtəlif regionlarında bu tip cihazlar aşkar edilərək götürülüb. Hadisə ilə bağlı cinayət işi başlanıb.
FSB-nin Ukrayna xüsusi xidmət orqanlarının iştirakı barədə irəli sürdüyü ittihamlar müstəqil şəkildə təsdiqlənməyib. Təqdim olunan məlumatda Ukrayna tərəfinin bu iddialara münasibəti yer almır.