Ukrayna Patriot sistemlərinə daha ucuz alternativ kimi nəzərdə tutulan Freyja ballistik raketdən müdafiə sisteminin hazırlanmasını sürətləndirib. Layihəni Ukraynanın Fire Point şirkəti həyata keçirir və sistemə Avropanın 13-dən çox müdafiə şirkətinin texnologiyalarının inteqrasiyası nəzərdə tutulur. Bu barədə Reuters məlumat yayıb.
Redaksiya istinadla xəbər verir ki, Freyja layihəsində radarlar, hədəfi izləmə sistemləri, idarəetmə mərkəzləri və digər komponentlər üzrə Avropa şirkətlərinin həllərindən istifadə olunur. Layihədə Eurosam, Leonardo, Thales və Saab kimi şirkətlərin iştirakı nəzərdə tutulur. Fire Point isə özünün təkmilləşdirilmiş FP7.X raketini tutucu raket kimi istifadə etməyi planlaşdırır.
Şirkətin əsas hədəflərindən biri bir tutucu raketin qiymətini 1 milyon avrodan aşağı saxlamaqdır. Bununla Freyja-nın hazırda Ukraynanın ballistik raketlərə qarşı əsas vasitələrindən biri olan ABŞ istehsalı Patriot sistemindən daha sərfəli alternativə çevrilməsi planlaşdırılır.
Fire Point 2027-ci ilin ortalarınadək ilk uğurlu ballistik raket tutmasını həyata keçirməyi qarşıya məqsəd qoyub. Ukrayna tərəfi eyni zamanda Freyja sisteminin işlək prototipinin 2027-ci ilin birinci yarısında hazır olmasını və ilk praktiki nəticələri nümayiş etdirməsini istəyir.