Bolqarıstanın paytaxtı Sofiya yaxınlığında yerləşən peyk rabitəsi obyektində 17 Starlink antennasından 11-i naməlum şəxslər tərəfindən yandırılıb. Məlumata görə, sözügedən antenalar Ukrayna, o cümlədən ölkənin hərbi qüvvələri üçün peyk rabitəsinin təmin edilməsində istifadə olunub. Bu barədə oktyabrın 14-də Bolqarıstanın BNT telekanalı və Novinite nəşri məlumat yayıb.
Redaksiya mənbəyə istinadən xəbər verir ki, hadisə Sofiya yaxınlığındakı mühafizə olunan rabitə obyektində baş verib. İlkin məlumatlara əsasən, maskalı iki şəxs əraziyə daxil olaraq Starlink peykləri ilə əlaqəni təmin edən antenaları qəsdən yandırıb.
Hadisə barədə ilk məlumatı Bolqarıstan parlamentinin “Bəli, Bolqarıstan!” partiyasından olan deputatı İvaylo Mirçev açıqlayıb. O, sosial şəbəkədə paylaşım edərək ölkənin təhlükəsizlik orqanlarını hadisəyə lazımi səviyyədə reaksiya verməməkdə ittiham edib.
Mirçev bildirib ki, obyektin 17 antennasından 11-nin yandırılması təsadüfi hadisə deyil və bunun məqsədyönlü təxribat ola biləcəyinə dair ciddi şübhələr mövcuddur. Deputat hadisənin arxasında Rusiya ilə əlaqəli qüvvələrin dayana biləcəyini iddia edib.
Bolqarıstanın Baş naziri Rumen Radev hadisənin araşdırıldığını təsdiqləyib. O, parlamentdə çıxışı zamanı hüquq-mühafizə və təhlükəsizlik orqanlarının xarici tərəfdaşlarla əməkdaşlıq şəraitində araşdırma apardığını bildirib.
“İstintaq son dərəcə intensiv şəkildə aparılır. Bu əməliyyatın uğurla həyata keçirilməsi üçün tərəfdaş xidmətlərlə birlikdə işləyirik”, - deyə Radev vurğulayıb.
Baş nazir araşdırmanın maraqları naminə təhlükəsizlik orqanlarının hadisənin bütün təfərrüatlarını hələlik ictimaiyyətə açıqlamamasını istəyib. O, hücumun təşkilatçıları və mümkün xarici əlaqələri barədə yekun nəticə elan etməyib.
Məlumata görə, yandırılan antenalar SpaceX şirkətinin Starlink peyk şəbəkəsi ilə rabitəni təmin edən yerüstü infrastruktura aid olub. Starlink sistemi Ukraynada hərbi bölmələr arasında rabitə, məlumat mübadiləsi və pilotsuz uçuş aparatlarının idarə olunması üçün geniş istifadə edilir.
Bununla belə, Bolqarıstandakı obyektin sıradan çıxmasının Ukrayna ordusunun rabitə imkanlarına konkret hansı miqyasda təsir göstərdiyi hələlik açıqlanmayıb.
Hadisə Avropada peyk rabitəsi infrastrukturuna qarşı mümkün təxribatlarla bağlı narahatlıqların artdığı dövrə təsadüf edir. Sentyabrın 23-də Polşada yerləşən Starlink rabitə obyektinə də yanğın törətməklə hücum edilmişdi. Həmin hadisə nəticəsində stansiyanın enerji təchizatı sistemi və ehtiyat generatoru sıradan çıxmışdı.
Polşa rəsmiləri həmin hücumun arxasında Rusiya xüsusi xidmət orqanlarının dayandığını iddia edirlər. Hadisə ilə bağlı bir neçə şübhəli Almaniyada saxlanılıb.
Bolqarıstandakı son hücumun Polşada baş verən hadisə ilə əlaqəli olub-olmadığı isə məlum deyil. Həmçinin hücumun hansı şəxslər və ya təşkilatlar tərəfindən sifariş edildiyi rəsmi şəkildə müəyyənləşdirilməyib.
Hazırda Bolqarıstanın təhlükəsizlik qurumları hadisənin bütün hallarını araşdırır. İstintaqın nəticələri və zədələnmiş antenaların bərpası ilə bağlı əlavə məlumat gözlənilir.