Birləşmiş Ərəb Əmirlikləri Hörmüz boğazından yan keçən yeni neft boru kəməri inşa etməyi planlaşdırır.
Redaksiya Reuters-ə istinadla xəbər verir ki, yeni kəmər Fuceyrə limanına qədər uzanacaq və 2027-ci ildə istifadəyə verilməsi gözlənilir. Layihə BƏƏ-nin bu liman üzərindən neft ixrac imkanlarını ikiqat artıracaq.
Fuceyrə limanı Hörmüz boğazından kənarda yerləşdiyi üçün BƏƏ üçün strateji əhəmiyyət daşıyır. Yeni boru kəməri regional gərginlik və boğazda mümkün bağlanma riskləri fonunda ölkənin enerji ixracını daha təhlükəsiz marşrutla həyata keçirməsinə imkan verəcək.
Hörmüz boğazı dünya neft ticarətinin əsas keçidlərindən biridir və regiondakı hərbi-siyasi gərginlik qlobal enerji bazarları üçün ciddi risk yaradır. Bu səbəbdən BƏƏ alternativ ixrac infrastrukturu qurmaqla enerji təhlükəsizliyini gücləndirməyə çalışır.
Ekspertlər hesab edirlər ki, layihə yalnız BƏƏ üçün deyil, qlobal neft bazarı üçün də əhəmiyyətlidir. Fuceyrə xəttinin genişlənməsi Körfəz neftinin beynəlxalq bazarlara daha sabit və çevik şəkildə çatdırılmasına şərait yarada bilər.