Dünya iqtisadiyyatı qlobal ticarət gərginliklərinin və qeyri-müəyyənliklərin artması fonunda mərkəzi bankların aprel ayında ehtiyatlı addımlar atması ilə üzləşib. ABŞ-ın proteksionist siyasəti və ticarət tariflərindəki dəyişikliklər dünya iqtisadiyyatında narahatlıq yaradır.
Redaksiya məlumat verir ki, bir çox mərkəzi banklar qlobal iqtisadi qeyri-müəyyənliklərə diqqət yetirərək, resessiya və inflyasiya arasında balans yaratmağa çalışırlar. ABŞ-ın "Öncə Amerika" siyasəti çərçivəsində tətbiq etdiyi tarif siyasətinin inflyasiya təzyiqlərini gücləndirə biləcəyi və iqtisadi artıma mənfi təsir göstərə biləcəyi ilə bağlı narahatlıqlar var. Aprel ayında Kanada, Avstraliya, Cənubi Koreya, Polşa, Macarıstan və Rusiya mərkəzi bankları faiz dərəcələrini dəyişməyib. Avropa Mərkəzi Bankı (ECB) və Yeni Zelandiya Mərkəzi Bankı isə faiz dərəcələrini aşağı salıb.
ECB, bazar gözləntilərinə uyğun olaraq, üç əsas siyasət faizini 25 baza bəndi endirib. Bu qərarın inflyasiya görünüşü və dinamikası, həmçinin pul siyasətinin ötürülmə gücü əsasında qəbul edildiyi bildirilib. ECB prezidenti Kristin Laqard, ticarət gərginliklərinin iqtisadi artıma mənfi təsir göstərdiyini vurğulayıb. Yeni Zelandiya Mərkəzi Bankı da faiz dərəcəsini 25 baza bəndi endirərək 3,50%-ə salıb. Hindistan Mərkəzi Bankı isə may ayından bəri ikinci dəfə əsas repo faiz dərəcəsini endirərək pul siyasətini "neytral"dan "dəstəkləyici"yə dəyişib.
Kanada və Cənubi Koreya mərkəzi bankları aprel ayında siyasət faizlərini dəyişməyib. Rusiya Mərkəzi Bankı isə faiz dərəcəsini dəyişməyərək 21%-də saxlayıb. Polşa və Macarıstan mərkəzi bankları da faiz dərəcələrini sabit saxlayıb. Türkiyə Respublikası Mərkəzi Bankı (TCMB) isə aprel ayında faiz dərəcəsini 350 baza bəndi artıraraq 46%-ə yüksəldib.
Ümumilikdə, mərkəzi bankların aprel ayında atdığı addımlar qlobal iqtisadiyyatdakı qeyri-müəyyənliklərə və inflyasiya təzyiqlərinə qarşı ehtiyatlı yanaşmanın göstəricisidir.
Fərid Əlizadə