Şəhidlərin xatirəsi Azərbaycan cəmiyyətində yalnız keçmişin ağrılı hadisələri ilə bağlı anlayış deyil. Bu xatirə eyni zamanda gələcək qarşısında məsuliyyət hissini formalaşdıran mühüm mənəvi amildir. 27 Sentyabr – Anım Günü həmin məsuliyyətin ümummilli səviyyədə ifadə olunduğu tarixdir. Vətən müharibəsində Azərbaycan oğulları və qızları dövlətin ərazi bütövlüyü və suverenliyi uğrunda həyatlarını fəda etdilər. Onların göstərdiyi qəhrəmanlıq Azərbaycan tarixinin yeni mərhələsinin formalaşmasına təsir göstərdi. Bu gün şəhidlərin həyat yolunun öyrənilməsi gənclərin vətənpərvərlik tərbiyəsində mühüm əhəmiyyət daşıyır. Lakin vətənpərvərlik yalnız sözlə ifadə edilən hiss deyil.
Vətənpərvərlik dövlət qanunlarına hörmət, məsuliyyətli vətəndaş mövqeyi və cəmiyyətin inkişafına töhfə verməkdir. Şəhidlərin əmanəti də məhz belə bir məsuliyyətli cəmiyyətin formalaşdırılması ilə bağlıdır. Güclü dövlətin əsas dayaqları arasında milli birlik, iqtisadi inkişaf, təhlükəsizlik və sosial sabitlik xüsusi yer tutur. Azərbaycanın son illərdə həyata keçirdiyi genişmiqyaslı layihələr dövlətin uzunmüddətli inkişaf imkanlarını genişləndirir. Azad edilmiş ərazilərdə aparılan bərpa işləri bunun mühüm istiqamətlərindən biridir.
Yeni yolların, yaşayış məntəqələrinin, məktəblərin, xəstəxanaların və digər infrastrukturun yaradılması həmin ərazilərdə həyatın bərpasına xidmət edir. Keçmiş məcburi köçkünlərin doğma torpaqlarına qayıdışı bu prosesin ən mühüm sosial nəticələrindən biridir. Bu qayıdış həm də şəhidlərin uğrunda mübarizə apardıqları torpaqların yenidən həyat məkanına çevrilməsini ifadə edir. Minalardan təmizləmə işlərinin aparılması isə bu prosesin təhlükəsizlik baxımından əsas şərtlərindəndir. Azərbaycanın qarşısında duran mühüm vəzifələrdən biri azad edilmiş ərazilərin dayanıqlı iqtisadi inkişafını təmin etməkdir. Bu ərazilərin enerji, logistika, kənd təsərrüfatı və turizm imkanlarının reallaşdırılması ölkənin ümumi inkişafına da töhfə verə bilər. Beləliklə, şəhidlərin xatirəsinə ehtiram dövlət quruculuğunun konkret nəticələri ilə tamamlanmalıdır. Anım Günü bizə göstərir ki, tarixi qələbələrin davamlı nəticəyə çevrilməsi üçün sülh və inkişaf mühiti vacibdir. Azərbaycanın regionda uzunmüddətli sabitliyin təmin olunmasında maraqlı olması da bu kontekstdə qiymətləndirilə bilər. Sülhün möhkəmlənməsi yeni iqtisadi və humanitar əlaqələrin yaranması üçün imkanlar yarada bilər.
Bu isə həm Azərbaycan, həm də bütövlükdə Cənubi Qafqaz üçün yeni inkişaf perspektivləri formalaşdırır. Şəhidlərin xatirəsini yaşatmaq həm də onların ailələrinə və qazilərə göstərilən diqqətin davamlı olmasını tələb edir. Cəmiyyətin şəhid ailələrinə münasibəti milli həmrəyliyin mühüm göstəricilərindən biridir. Anım Günü bu həmrəyliyi daha da gücləndirmək üçün mənəvi imkan yaradır. Şəhidlərin əmanəti güclü, təhlükəsiz, inkişaf edən və gələcəyə inamla baxan Azərbaycan qurmaqdır. Bu məqsədə xidmət edən hər bir məsuliyyətli fəaliyyət onların müqəddəs xatirəsinə ehtiramın praktik ifadəsidir.
Əbəlfəz Eyvazov
Neftçala rayonu