Yunanıstanın xarici işlər naziri Giorgos Gerapetritis ölkəsinin İsraillə strateji münasibətlərə malik olduğunu və iki tərəf arasında artıq çoxşaxəli əməkdaşlıq formalaşdığını bildirib. O, Yunanıstanın Yaxın Şərq məsələlərinə yanaşmasının ABŞ Dövlət katibi Marko Rubionun mövqeyi ilə də böyük ölçüdə üst-üstə düşdüyünü deyib.
Redaksiya xəbər verir ki, Gerapetritis Afinanın həm ABŞ, həm İsrail, həm də ərəb ölkələri ilə paralel strateji əlaqələr qurmağa çalışdığını vurğulayıb. Onun sözlərinə görə, bu yanaşma Yunanıstana regionda daha geniş diplomatik manevr imkanları verir.
Yunanıstan XİN rəhbəri daha əvvəl də ölkəsinin İsraillə münasibətlərini strateji tərəfdaşlıq kimi xarakterizə edib. Afina və Təl-Əviv son illərdə müdafiə, enerji, texnologiya və təhlükəsizlik sahələrində əməkdaşlığı genişləndiriblər.
Gerapetritisin açıqlaması ABŞ Dövlət katibi Marko Rubionun Afinaya səfəri və Yunanıstan-ABŞ Strateji Dialoqunun altıncı raundu fonunda səslənib. Tərəflər regional təhlükəsizlik, Yaxın Şərqdəki vəziyyət, terrorla mübarizə və Şərqi Aralıq dənizində əməkdaşlıq məsələlərini müzakirə ediblər.
Yunanıstan hökuməti eyni zamanda ərəb ölkələri ilə münasibətlərin də strateji əhəmiyyət daşıdığını bildirir və regiondakı siyasətini yalnız İsraillə tərəfdaşlıq üzərində qurmadığını vurğulayır.