ABŞ və Çin Hörmüz boğazından keçən gəmilərdən rüsum alınmasına qarşı ortaq mövqe nümayiş etdirib.
Redaksiya xəbər verir ki, ABŞ dövlət katibi Marko Rubio və Çin xarici işlər naziri Vanq Yi apreldə keçirdikləri telefon danışığında bu məsələni müzakirə ediblər. Tərəflər beynəlxalq su yollarında heç bir ölkənin və ya qurumun gəmi keçidlərinə məcburi rüsum tətbiq etməməli olduğu barədə razılığa gəliblər.
Məsələ İranın Hörmüz boğazından keçən gəmilərdən ödəniş almaq niyyəti fonunda gündəmə gəlib. Bu addım qlobal enerji bazarlarında yeni gərginlik riski yaradıb, çünki dünya neft və maye qaz ticarətinin mühüm hissəsi məhz bu marşrutdan keçir.
ABŞ Dövlət Departamenti bildirib ki, Hörmüz boğazında gəmi hərəkətinə əlavə rüsum tətbiqi beynəlxalq ticarət və enerji təhlükəsizliyi üçün təhlükəli presedent yarada bilər. Vaşinqton bu məsələdə Pekinlə ortaq mövqenin formalaşmasını mühüm diplomatik siqnal kimi qiymətləndirir.
Çin üçün də Hörmüz boğazı strateji əhəmiyyət daşıyır. Pekin enerji idxalının mühüm hissəsini Körfəz regionundan aldığı üçün boğazda hər hansı əlavə rüsum və ya məhdudiyyət Çin iqtisadiyyatına birbaşa təsir göstərə bilər.