Venesuelada fəaliyyət göstərən Cartel de los Soles qruplaşmasının xarici terror təşkilatı kimi tanınacağı barədə ABŞ Dövlət Departamentinin açıqlaması beynəlxalq gündəmdə geniş rezonans doğurub. Sənəddə kartelin Nikolas Maduro və onun rejiminin yüksək vəzifəli şəxsləri tərəfindən idarə olunduğu bildirilir.
Redaksiya ABŞ Xarici İşlər və ABŞ Maliyyə Nazirliyinə istinadla xəbər verir ki, 24 noyabr 2025‑dən qüvvəyə minəcək qərar Cartel de los Soles-in ABŞ və Avropaya narkotik qaçaqmalçılığı, həmçinin digər terror təşkilatları — xüsusilə Tren de Aragua və Sinaloa karteli ilə əməkdaşlıq fəaliyyətləri ilə əsaslandırılıb. Sanksiya tədbirləri ABŞ prezidenti Donald Trampın “Amerikanı Birinci etmək” siyasəti çərçivəsində həyata keçirilən addımlar kimi təqdim olunub.
Məlumatda qeyd olunur ki, kartel ABŞ Xəzinədarlığının Xarici Aktivlərin İdarəetməsi tərəfindən daha əvvəl də “Qlobal Xüsusi Terrorçu” kimi siyahıya salınmışdı. Dövlət Departamentinin yeni qərarı isə kartelin Venesuela dövlət strukturlarını korrupsiya yolu ilə öz məqsədlərinə tabe etdiyini vurğulayır.
Sanksiyalara əsasən, Cartel de los Soles və ona bağlı şəxslərin ABŞ-da yerləşən bütün aktivləri bloklanır, ABŞ yurisdiksiyası altında olan şəxslərin həmin qurumlarla hər hansı maliyyə və ya ticari əməliyyat aparması qadağan edilir. Bununla yanaşı, qrupla əlaqədə olan xarici maliyyə institutları da ikinci dərəcəli sanksiyalarla üzləşə bilərlər.
ABŞ administrasiyası bildirir ki, bu addımların məqsədi cəzalandırma deyil, beynəlxalq təhlükəsizliyi təhdid edən narqo‑terror şəbəkələrinin fəaliyyətini məhdudlaşdırmaq və onların maliyyə mənbələrini tamamilə kəsməkdir.