ABŞ-ın Şimali Karolina ştatında yaşayan Ceyms Qeyts (James Gates) həyat yoldaşının onu zəhərləməyə cəhd etdiyini və bu prosesdə ChatGPT süni intellekt (Sİ) sistemindən istifadə etdiyini iddia edərək OpenAI şirkətini məhkəməyə verib. İddiaçı çatbotun həyat yoldaşına zəhərli maddələr barədə məlumat verdiyini, hücum planının hazırlanmasına və izlərin gizlədilməsinə kömək etdiyini bildirir. Bu barədə Bloomberg və CBS News məlumat yayıb.
Redaksiya mənbəyə istinadən xəbər verir ki, Ceyms Qeyts OpenAI və şirkətin baş direktoru Sem Altmana qarşı Kaliforniya ştatının San-Fransisko şəhərində mülki iddia qaldırıb. Məhkəmə işi barədə məlumat noyabrın 5-də ictimaiyyətə açıqlanıb.
İddia ərizəsinə əsasən, Qeytsin həyat yoldaşı Şeril Qeyts 2025-ci ildə ChatGPT-dən müntəzəm istifadə etməyə başlayıb. Əvvəlcə gündəlik məsələlərlə bağlı müraciətlər edən qadın sonradan ailə münasibətlərindəki problemləri də çatbotla müzakirə edib.
Ceyms Qeytsin iddiasına görə, həyat yoldaşı onun özünü zəhərləyə biləcəyindən qorxduğunu bildirərək süni intellektdən müdafiə məqsədilə məlumat istəməyə başlayıb.
Məhkəməyə təqdim edilmiş materiallarda ChatGPT-nin qadına oleandr adlı zəhərli bitki və bəzi dərman vasitələrinin təhlükələri barədə məlumat verdiyi iddia olunur. Ərizədə çatbotun sonrakı cavablarının mümkün zəhərləmə planının hazırlanmasına yardım etdiyi irəli sürülür.
Qeyts bildirib ki, 2025-ci ilin yayında evdə içdiyi qazlı və enerji içkilərinin dadında qeyri-adi acılıq hiss edib.
İddia sənədlərinə görə, iyulun 10-da onun səhhəti qəfil pisləşib. Kişi ürəklə bağlı simptomlar, güclü qarın ağrıları, halsızlıq və çaşqınlıq yaşadığını, ağır vəziyyətin təxminən üç gün davam etdiyini bildirib.
Daha sonra Qeyts həyat yoldaşının əl yazısı ilə hazırladığı qeydləri aşkarladığını açıqlayıb. Qeydlərdə zəhərli maddələrin və dərmanların adlarının, həmçinin ChatGPT yazışmalarının silinməsi barədə xatırlatmaların olduğu bildirilir.
Həmin materiallar polis araşdırmasının başlanmasına səbəb olub.
Şeril Qeyts 2025-ci ilin oktyabrında qəsdən adam öldürməyə cəhd və qida məhsullarına zərərli maddə qatılması ilə bağlı ittihamlarla üzləşib.
Lakin 2026-cı ilin aprelində prokurorluq kifayət qədər sübut olmadığına görə cinayət ittihamlarını geri götürüb. Bu qərar qadının məhkəmə tərəfindən təqsirli bilinməsi və sonradan cəzadan azad edilməsi demək deyil.
Ceyms Qeyts isə OpenAI-ın təhlükəsizlik mexanizmlərinin yetərsiz olduğunu iddia edərək şirkətdən dəymiş fiziki, psixoloji və maliyyə zərərinə görə təzminat tələb edir.
OpenAI hadisə ilə bağlı açıqlama verərək təhlükəsizliyin şirkət üçün əsas prioritet olduğunu bildirib.
Şirkətin nümayəndəsi sözügedən istifadəçi hesabının bloklandığını və hüquq-mühafizə orqanlarının araşdırmasına müvafiq məlumatların təqdim edildiyini təsdiqləyib.
Məhkəmə işi süni intellekt sistemlərinin təhlükəli sorğulara verdiyi cavablar və texnologiya şirkətlərinin üçüncü şəxslərə vurula biləcək zərərə görə hüquqi məsuliyyəti ilə bağlı müzakirələri yenidən gündəmə gətirib.
Bununla belə, ChatGPT-nin iddia edilən zəhərləmə cəhdində hüquqi məsuliyyət daşıdığı məhkəmə tərəfindən müəyyən edilməyib. Hazırda OpenAI-a qarşı irəli sürülən ittihamlar mülki məhkəmə araşdırmasının predmetidir.