ABŞ Birləşmiş Millətlər Təşkilatının Dayanıqlı İnkişaf Məqsədlərini (DİM) və bu çərçivədə qəbul olunmuş 2030-cu il Gündəliyini rədd etdiyini açıqlayıb. Tramp administrasiyası BMT Baş Assambleyasında çıxış edərək, ölkənin artıq bu hədəfləri dəstəkləməyəcəyini bəyan edib.
Redaksiya xəbər verir ki, ABŞ eyni gün BMT tərəfindən yaradılmış İtki və Zərər Fondunun idarə heyətindən də çıxdığını elan edib. Sözügedən fond 2022-ci ildə keçirilən COP27 sammitində yaradılmış və iqlim dəyişikliyi nəticəsində təbii fəlakətlərdən ən çox zərər çəkən ölkələrə maliyyə dəstəyi göstərməyi hədəfləyirdi. ABŞ-ın fondun idarə heyətindəki nümayəndələri istefa verərək, vəzifələrini başqa nümayəndəyə ötürməyəcəklərini bildiriblər.
ABŞ nümayəndəsi Edvard Hartni Baş Assambleyada çıxışı zamanı DİM-ləri “ABŞ-ın suverenliyinə zidd və amerikalıların maraqlarına zərərli olan qlobal idarəçilik təşəbbüsü” adlandırıb. O əlavə edib ki, Tramp administrasiyası “gender və iqlim ideologiyasına qarşı açıq və gecikmiş kurs dəyişikliyi” həyata keçirir.
Həmin gün ABŞ bir sıra qətnamələrin əleyhinə səs verib. Bunlara “Beynəlxalq Sülh İçində Birgəyaşayış Günü” və “Demokratiya üçün Təhsil” adlı sənədlər daxildir. ABŞ nümayəndəsi bu sənədlərdə DİM-lərin əsaslandırma kimi göstərilməsini “dairəvi və məntiqsiz” adlandırıb və onların “yalnız iki cinsin mövcudluğuna dair dəqiq dil işlətmədiyini” tənqid edib.
Baş Assambleya isə hər iki qətnaməni böyük əksəriyyətlə qəbul edib. ABŞ yalnız İsrail və Argentina ilə birgə səsvermədə əleyhdə qalıb. Bununla yanaşı, Vaşinqtonun iqlim siyasətindəki bu addımları Paris Sazişindən yenidən çıxış və inkişaf etməkdə olan ölkələr üçün təmiz enerji keçidinə maliyyə dəstəyini nəzərdə tutan koalisiyanı tərk etməsi ilə üst-üstə düşür.