ABŞ Prezidenti Donald Trampın ikinci prezidentlik müddətində 175 mindən çox xarici vətəndaşın vizası ləğv edilib. Ləğvetmələrin əsas səbəbləri sırasında viza rejiminin pozulması, cinayət əməlləri, zorakılığa çağırışlar, dələduzluq və milli təhlükəsizliyə təhdidlər göstərilir. Bu barədə Reuters məlumat yayıb.
Redaksiya istinadla xəbər verir ki, ABŞ Dövlət Departamenti vizaların ləğvinə səbəb olan ən geniş yayılmış hüquq pozuntuları arasında hücum, sərxoş vəziyyətdə avtomobil idarəetmə, oğurluq və narkotiklərlə bağlı cinayətləri göstərib. Departament daha ağır cinayət işləri ilə əlaqəli şəxslərin vizalarının da ləğv edildiyini bildirib.
Vizası ləğv edilənlər arasında mühafizəkar fəal Çarli Kirkin öldürülməsini sosial şəbəkələrdə alqışlamaqda və ya bunu müsbət şəkildə təqdim etməkdə ittiham olunan xarici vətəndaşlar da olub. ABŞ Dövlət Departamenti daha əvvəl bu cür paylaşımlara görə altı xarici vətəndaşın vizasını ləğv etdiyini açıqlamışdı.
Bundan əlavə, ABŞ-nin Şimali Afrikadakı diplomatik nümayəndəliklərindən biri doğum turizmi ilə əlaqələndirilən 100-dən çox şəxsin vizasını ləğv edib. Söhbət əsasən ABŞ-yə uşaq dünyaya gətirmək və körpənin Amerika vətəndaşlığı əldə etməsini təmin etmək məqsədilə səfər edən şəxslərdən gedir. ABŞ qaydalarına əsasən, turist vizası əsas məqsəd doğuş yolu ilə uşağa ABŞ vətəndaşlığı qazandırmaq olduqda verilə bilməz.
Reuters-in məlumatına görə, Tramp administrasiyası ikinci prezidentlik müddətində viza yoxlamalarını, o cümlədən sosial media və təhlükəsizlik araşdırmalarını sərtləşdirib. Dövlət Departamenti bundan əvvəl də 100 mindən çox vizanın ləğv edildiyini açıqlamışdı və son göstərici bu siyasətin daha da genişləndirildiyini göstərir.