Ukrayna Prezidenti Volodimir Zelenski bildirib ki, bu gün Rumıniya hava məkanında Rusiyaya məxsus pilotsuz uçuş aparatının (PUA) aşkarlanması ilə əlaqədar olaraq qırıcı təyyarələr havaya qaldırılıb. Onun sözlərinə görə, PUA təxminən 10 kilometr dərinlikdə Rumıniya ərazisinə daxil olub və NATO ölkəsinin hava məkanında 50 dəqiqəyə yaxın fəaliyyət göstərib.
Redaksiya xəbər verir ki, Zelenski əlavə olaraq Polşanın da eyni gün Rusiyanın pilotsuz uçuş aparatları təhlükəsinə qarşı hərbi müdaxilə həyata keçirdiyini vurğulayıb. Dövlət başçısı Moskvanın PUA-ların uçuş marşrutlarını və havada qalma müddətini dəqiq bildiyini qeyd edib.
Zelenskinin sözlərinə görə, bu cür hallar nə təsadüf, nə də aşağı səviyyəli hərbi komandirlərin icazəsiz addımı ola bilər. O, Rusiyanın regionda gərginliyi artırmaq üçün məqsədyönlü fəaliyyət göstərdiyini bəyan edib.