Yunanıstan sahillərində güclü zəlzələ baş verib və sunami xəbərdarlığı edilib. Yeraltı təkanlar nəticəsində bölgədə yaşayan əhali arasında narahatlıq yaranıb.
Redaksiya xəbər verir ki, Almaniya Geofizika Tədqiqat Mərkəzinin (GFZ) məlumatına görə, mayın 13-də Yunanıstanın Krit adası sahillərində 6.3 bal gücündə zəlzələ qeydə alınıb. Zəlzələnin episentri 83 kilometr dərinlikdə yerləşib. Misir sakinləri də zəlzələni hiss ediblər, lakin ölkənin Astronomiya və Geofizika Milli Tədqiqat İnstitutu heç bir itki və ya maddi zərər barədə məlumat verməyib. İnstitut Misirin şimal sahillərindən 431 km məsafədə 6.4 bal gücündə zəlzələ qeydə aldığını bildirib.
Zəlzələnin təsirləri ilə bağlı ətraflı məlumatlar hələlik dəqiqləşdirilir. Yunanıstan və Misir hakimiyyəti tərəfindən zərər dəymiş ərazilərdə axtarış-xilasetmə işləri aparılır. Sunami xəbərdarlığı ilə əlaqədar olaraq, sahilboyu ərazilərdə yaşayan əhali təhlükəsiz yerlərə təxliyə olunub.
Hadisənin nəticələri və sonrakı inkişaflar barədə məlumatlar dəqiqləşdikcə ictimaiyyətə çatdırılacaq.
Sevinc Kərimova