ABŞ-ın keçmiş milli təhlükəsizlik müşaviri Mayk Uoltsun "Signal" tətbiqindən istifadəsi ilə bağlı yeni iddialar gündəmə gəlib. Bu dəfəki hadisə, yüksək vəzifəli şəxslərlə əlaqə yaratmaq üçün "Signal"a bənzəyən, lakin əslində başqa bir tətbiqdən istifadə etməsi ilə bağlıdır.
Redaksiya xarici mətbuata istinadla xəbər verir ki, "Reuters" agentliyinin yaydığı fotoda Uoltsun Ağ Evdə prezident Trampın kabinet iclası zamanı telefonuna baxdığı əks olunub. Şəkilin Uoltsun ekranını göstərən hissəsini böyüdükdə, onun "Signal" kimi görünən, lakin əslində "TM SGNL" kimi qeyd olunan "TeleMessage Signal" adlı İsrail istehsalı olan tətbiqdən istifadə etdiyi məlum olub. Bu tətbiq, ABŞ-ın yüksək vəzifəli şəxsləri, o cümlədən, C.D. Vens, Marko Rubio və Tulsi Qabbard ilə mesajlaşmaq üçün istifadə edilib.
"SignalGate" qalmaqalı, hökumətin ənənəvi "əməliyyat təhlükəsizliyi" protokollarının pozulması və federal qeydlərin saxlanması qanunlarına riayət edilməməsi ilə bağlı narahatlıqları artırıb. Uolts, "Houthi PC Small Group" adlı söhbət qrupunu yaradan və "Atlantic" jurnalının baş redaktorunu da bu qrupa əlavə edən şəxs olub. Ekspertlər, bu cür tətbiqlərin istifadəsinin, xüsusilə həssas məlumatların ötürülməsi üçün, ciddi təhlükələr yarada biləcəyini vurğulayırlar. "TeleMessage Signal" kimi tətbiqlər, məlumatların saxlanması tələblərinə cavab verməyə çalışsa da, düşmənlərin mesajlara çıxışını asanlaşdırır.
"TeleMessage", 1999-cu ildə İsrail Müdafiə Qüvvələrinin keçmiş texnoloqları tərəfindən yaradılıb və ötən il ABŞ-da yerləşən rəqəmsal kommunikasiya arxivləşdirmə şirkəti "Smarsh" tərəfindən satın alınana qədər İsraildə fəaliyyət göstərib. Bu xidmət, "WhatsApp", "WeChat", "Telegram" və "Signal" kimi tətbiqlərdən göndərilən mesajları qeyd etmək və saxlamaq üçün "mobil arxivator" aləti ilə təchiz edilmiş kommunikasiya tətbiqlərinin surətlərini yaradır.
Bu hadisə, yüksək vəzifəli şəxslərin məlumat təhlükəsizliyinə nə qədər diqqət yetirməsi və müasir texnologiyaların istifadəsindəki riskləri bir daha gündəmə gətirir.
Sevinc Kərimova