Ukrayna Xarici Kəşfiyyat Xidmətinin rəsmisi Oleh Aleksandrov bildirib ki, Çin Rusiyaya Ukrayna ərazisində raket hücumlarını daha dəqiq həyata keçirmək üçün kəşfiyyat məlumatı ötürür. Onun sözlərinə görə, Pekin Moskva ilə peyk məlumatlarının paylaşılması sahəsində sıx əməkdaşlıq edir.
Redaksiya xəbər verir ki, Aleksandrov Ukrinform agentliyinə açıqlamasında Çinlə Rusiya arasında “Ukrayna ərazisində strateji hədəflərin müəyyənləşdirilməsi və izlənməsi məqsədilə peyk kəşfiyyatı üzrə yüksək səviyyəli əməkdaşlıq” olduğunu deyib. O, bu obyektlərin bir hissəsinin xarici sərmayədarlara məxsus olduğunu da əlavə edib.
Bu ilin avqustunda Rusiyanın Qərbi Zakarpatya bölgəsində ABŞ-a məxsus zavodu vurduğu hücum nəticəsində 15 nəfər yaralanmışdı. Prezident Vladimir Zelenski daha əvvəl Çinin Rusiyaya silah və barıt tədarük etdiyini, hətta bəzi silahların Rusiya ərazisində istehsal olunduğunu açıqlamışdı.