ABŞ rəsmiləri Qəzzada yaradılması planlaşdırılan beynəlxalq qüvvədə Türkiyənin iştirakına dair yeni təklif irəli sürüblər. Təklifə əsasən, Türkiyənin prosesdə rolu məhdudlaşdırılaraq hərbi kontingentin Qəzzaya göndərilməsi nəzərdə tutulmur.
Redaksiya Kan News-a istinadla xəbər verir ki, plan Türkiyənin yalnız logistik dəstək göstərməsini, bu fəaliyyətlərin isə İordaniya və Misirdə yerləşən bazalar vasitəsilə həyata keçirilməsini ehtiva edir. Bu yanaşma bölgədəki həssas təhlükəsizlik balansını qorumağa yönəlib.
Bundan əvvəl İsrailin ABŞ administrasiyasına müraciət edərək Türkiyə prezidenti Rəcəb Tayyib Ərdoğanın yaradılması planlaşdırılan Sülh Şurasından kənarda saxlanılmasını istədiyi bildirilmişdi. İsrail rəsmiləri Türkiyə hərbçilərinin və bərpa prosesində Ankaranın fəal iştirakının Qəzzada təsir imkanlarını artıra biləcəyindən narahat olduqlarını açıqlamışdılar.
The Jerusalem Post-un yaydığı məlumata əsasən, ABŞ prezidenti Donald Tramp Türkiyə və Ərdoğan barədə müsbət fikirlər səsləndirib və ona etimad etdiyini bildirib. Hazırda isə beynəlxalq təşəbbüsün yekun tərkibi ilə bağlı qərarın hələ verilmədiyi qeyd olunur.