Türkiyədə 15 yaşdan kiçik uşaqların sosial şəbəkələrdən istifadəsini qadağan edən yeni qaydalar qüvvəyə minib. Noyabrın 1-dən tətbiq olunan tənzimləmə həm yerli, həm də ölkə ərazisindən istifadə edilə bilən xarici sosial media platformalarını əhatə edir. Bu barədə Türkiyənin “Takvim” qəzeti məlumat yayıb.
Redaksiya mənbəyə istinadən xəbər verir ki, yeni qaydalara əsasən, sosial şəbəkələrdə hesab açmaq istəyən istifadəçilər yaşlarını dövlətin elektron xidmətlər portalı olan e-Devlet vasitəsilə təsdiqləməlidirlər.
Şəxsiyyətin yoxlanılmasından sonra istifadəçilərə yaş kateqoriyasını təsdiqləyən xüsusi rəqəmsal token veriləcək. Bu elektron təsdiq vasitəsində istifadəçinin adı və digər şəxsi məlumatları deyil, yalnız müəyyən edilmiş yaş həddinə uyğunluğu əks olunacaq.
Yeni tənzimləməyə əsasən, 15 yaşını tamamlamamış uşaqların sosial şəbəkələrdə hesab açmasına icazə verilməyəcək. Mövcud hesabların da yaş yoxlamasından keçirilməsi nəzərdə tutulur.
Daha əvvəl yaradılmış hesablar üçün yaşın təsdiqlənməsi prosesi 31 mart 2027-ci ilədək tamamlanmalıdır. Yoxlama nəticəsində 15 yaşdan kiçik şəxslərə məxsus olduğu müəyyən edilən hesablar müvafiq prosedurlara uyğun bağlanacaq.
15–17 yaşlı yeniyetmələr isə sosial şəbəkələrdən əlavə məhdudiyyətlərlə istifadə edə biləcəklər.
Bu yaş qrupuna aid hesablar məxfi rejimdə saxlanılacaq və onların hamı üçün açıq edilməsi mümkün olmayacaq. Yeniyetmələr canlı yayım aça bilməyəcək, onlara fərdiləşdirilmiş reklamlar göstərilməyəcək.
Mesajlaşma imkanları da məhdudlaşdırılacaq. Yeniyetmələr yalnız izlədikləri hesablardan mesaj qəbul edə biləcəklər. Onların izləyici və izlədikləri şəxslərin siyahıları digər istifadəçilərdən gizlədiləcək.
Yeni qaydalar valideynlərə övladlarının sosial media fəaliyyətinə nəzarət etmək üçün əlavə imkanlar da yaradır. Valideynlər hesab parametrlərini idarə edə, istifadə müddətini məhdudlaşdıra və ödənişli əməliyyatlara icazə verib-verməmək barədə qərar qəbul edə biləcəklər.
Türkiyə hakimiyyəti dəyişikliklərin əsas məqsədinin uşaqları zərərli rəqəmsal məzmundan qorumaq, onların şəxsi məlumatlarının təhlükəsizliyini artırmaq və sosial şəbəkələrdən yaşlarına uyğun istifadəni təmin etmək olduğunu bildirib.
Oxşar məhdudiyyətlər digər ölkələrdə də gündəmə gəlib. Avstraliyada sosial şəbəkələrdən istifadə üçün minimum yaş həddi 16 olaraq müəyyən edilib. Danimarka və Fransada da uşaqların sosial media platformalarına çıxışını məhdudlaşdıran təşəbbüslər irəli sürülüb.
Beləliklə, Türkiyədə yeni sistem sosial şəbəkə platformalarının istifadəçilərin yaşını yoxlamasını və yetkinlik yaşına çatmayan şəxslər üçün fərqli təhlükəsizlik qaydaları tətbiq etməsini məcburi edir.
