ABŞ prezidenti Donald Tramp “Truth Social” platformasında paylaşım edərək Kolumbiya prezidenti Qustavo Petroya qarşı sərt ifadələr işlədib və onu “narkotik istehsalını dəstəkləyən lider” adlandırıb. Tramp bildirib ki, ABŞ Kolumbiyaya göstərdiyi bütün maliyyə yardımlarını dayandırır və əgər Petro “ölüm tarlalarını” bağlamasa, bunu ABŞ-ın özü “heç də yumşaq olmayan şəkildə” edəcək.
Redaksiya xəbər verir ki, Tramp paylaşımında belə yazıb: “Prezident Qustavo Petro Kolumbiyada geniş və kiçik sahələrdə narkotik istehsalını təşviq edir. Bu, ölkənin ən böyük biznesinə çevrilib və Petro buna qarşı heç bir addım atmır. ABŞ-dan alınan ödənişlər və subsidiyalar isə sadəcə Amerika xalqının uzunmüddətli soyulmasıdır.”
Kolumbiya prezidenti Qustavo Petro Trampın açıqlamasına qaba cavab verib. Petro qeyd edib: “Cənab Tramp, Kolumbiya haqqında qaba və cahilsiniz. Məsləhətçiniz kimi ‘Yüz ilin tənhalığı’nı oxuyun — tənhalıqdan nəsə öyrənərsiniz. Mən sizin kimi iş adamı deyiləm, mən sosialistəm. Mən açgözlülüyə deyil, insanlığın və həyatın ortaq faydasına inanıram.” Petro əlavə edib ki, “kapitalizmin açgözlülük rəmzi olan mafiyadan fərqli olaraq, mən həyat aşiqiyəm və min illik həyat mübarizəsinin tərəfdarıyam.”