ABŞ Prezidenti Donald Trampın bu həftə Pekində Çin lideri Si Cinpinlə görüşü zamanı İranla müharibənin dayandırılması üçün Pekindən vasitəçilik dəstəyi istəməsi gözlənilir.
Redaksiya xəbər verir ki, məlumat “The Wall Street Journal”ın hesabatına əsasən yayılıb.
Məlumata görə, Trampın əsas məqsədi Çini İranla mümkün razılaşmanın əldə olunmasına kömək edən vasitəçi kimi prosesə cəlb etməkdir.
Görüşün əsas gündəmi ticarət məsələləri olsa da, ABŞ rəsmiləri İran mövzusunun da danışıqların mərkəzində olacağını bildirirlər.
Çinin də müharibənin başa çatmasında maraqlı olduğu qeyd olunur. Buna səbəb neft tədarükünə yaranan risklər və ölkələrin Çin məhsullarını almaq imkanlarının zəifləməsidir.
Bununla belə, Vaşinqton və Pekin arasında İran müharibəsinin necə bitməli olduğu ilə bağlı ciddi fikir ayrılıqları qalır.
Pekin döyüşlərin dayanmasını istəsə də, İran rejiminin qorunmasında və bərpa olunmasında maraqlıdır. Vaşinqton isə Tehrandan nüvə proqramı üzrə ciddi güzəştlər tələb edir.
Çin ötən həftə İranın xarici işlər nazirini qəbul edib. Bu addım Pekinin Tehranla əlaqələrini nümayiş etdirmək və qarşıdakı sammit öncəsi diplomatik mövqeyini gücləndirmək cəhdi kimi qiymətləndirilir.
Trampın görüş zamanı Çinin İran və Rusiyaya iqtisadi dəstəyini, eləcə də hər iki ölkəyə mümkün silah ixracı ilə bağlı narahatlıqları da qaldıracağı gözlənilir.