ABŞ prezidenti Donald Tramp, Avropa İttifaqına (Aİ) qarşı tətbiq olunacaq 50 faizlik tariflərin tətbiqini təxirə saldı. Bu qərar, ticarət danışıqlarının davam etdirilməsi və tərəflər arasında dialoqun aparılması məqsədi daşıyır.
Redaksiya məlumat verir ki, Tramp bu barədə özünün "Truth Social" sosial media hesabında Aİ Komissiyasının sədri Ursula fon der Leyenlə telefon danışığına istinadən məlumat yayıb. Tramp, fon der Leyenin 1 iyun tarixindən etibarən tətbiq olunması nəzərdə tutulan 50 faizlik tariflər üçün əlavə vaxt istədiyini bildirib və bu tələbə əsasən, son tarixi 9 iyul 2025-ə qədər təxirə saldığını qeyd edib. Tramp, fon der Leyenə Aİ və ABŞ arasındakı ticarət danışıqlarının tezliklə başlayacağını bildirdiyinə görə təşəkkürünü bildirib.
Fon der Leyen də öz növbəsində sosial media hesabında Trampla yaxşı bir görüş keçirdiyini vurğulayaraq, Aİ və ABŞ-nin dünyanın ən mühüm və yaxın ticarət əlaqələrini paylaşdığını qeyd edib. Tramp, mayın 23-də "Truth Social" hesabında Aİ ilə aparılan ticarət danışıqlarında irəliləyiş əldə olunmadığını bildirərək, 1 iyun tarixindən etibarən Aİ-yə qarşı 50 faizlik tarif tətbiq olunmasını təklif etmişdi. Lakin, ABŞ-də qurulmuş və ya istehsal olunmuş məhsullara gömrük vergisi tətbiq olunmayacağını da əlavə etmişdi.
ABŞ Xəzinə naziri Skott Bessent də, Trampın Aİ-nin ticarət müzakirələrində təklif etdiyi şərtlərin digər mühüm ticarət tərəfdaşlarından gələnlərlə eyni "keyfiyyətdə" olmadığını düşündüyünü bildirmişdi. Bu qərar, ABŞ-nin Aİ-yə qarşı tətbiq etdiyi tariflərin 90 günlük müddətinin 9 iyulda başa çatması ilə əlaqədardır.
Sevinc Kərimova