Tokioda Yaponiya Xarici İşlər Nazirliyinin binası qarşısında ABŞ hərbçilərinin Okinavadakı fəaliyyətinə etiraz aksiyası keçirilib. Aksiya 39 yaşlı Anna Yaginin qətlində şübhəli bilinən ABŞ dəniz piyadasının həbsindən sonra təşkil olunub. Bu barədə Reuters məlumat yayıb.
Redaksiya istinadla xəbər verir ki, aksiyada onlarla insan iştirak edib. Etirazçılar ABŞ hərbçiləri ilə bağlı təkrarlanan cinayət hadisələrinə görə Yaponiya hökumətindən daha sərt tədbirlər tələb ediblər.
Okinava polisi oktyabrın 3-də 20 yaşlı ABŞ dəniz piyadası Devin Ceykob Ballardı həbs edib. O, Naha şəhərindəki hoteldə Anna Yagini öldürmək və onun əşyalarını oğurlamaqda şübhəli bilinir. Ballard ittihamları rədd edir.
Hadisədən sonra Yaponiya hökuməti ABŞ tərəfinə sərt etirazını çatdırıb və oxşar halların qarşısının alınması üçün əlavə tədbirlər tələb edib. Yaponiyanın Baş naziri Sanae Takaiti qətli “son dərəcə qəddar və dəhşətli” hadisə kimi qiymətləndirib.
ABŞ hərbi komandanlığı isə Okinavadakı qüvvələr üçün 48 saatlıq əməliyyat fasiləsi tətbiq edib. Bundan əlavə, hərbi qulluqçular üçün spirtli içkilərə qadağa və 30 günlük gecə komendant saatı müəyyən olunub. Hərbçilər həmçinin intizam və davranış standartları üzrə əlavə təlim keçəcəklər.
Okinava ABŞ-ın Yaponiyadakı hərbi mövcudluğunun əsas mərkəzlərindən biridir. Ada ölkədəki ABŞ dəniz piyadalarının böyük hissəsinə ev sahibliyi edir və hərbçilərlə bağlı cinayət, səs-küy və qəza halları uzun illərdir yerli əhali arasında narazılıq yaradır.
Anna Yaginin qətli bu mübahisələri yenidən kəskinləşdirib. Tokiodakı aksiya Okinavada keçirilən etirazlardan sonra məsələnin artıq milli səviyyədə də geniş rezonans doğurduğunu göstərir.