Tesla şirkətinin baş icraçı direktoru (CEO) Elon Mask-ın vəzifəsindən uzaqlaşdırılması ilə bağlı yayılan xəbərlər şirkət daxilində və investorlar arasında narahatlıq yaradıb. Elektrik avtomobilləri istehsalçısı tərəfindən bu iddiaların təkzib edilməsinə baxmayaraq, şirkətin səhmlərinin dəyərindəki dəyişikliklər diqqətdən kənarda qalmayıb.
Redaksiya xəbər verir ki, Tesla rəhbərliyinin Musk-ın yerinə yeni bir CEO axtarışına başladığına dair məlumatlar Wall Street Journal-da dərc edilib. Şirkətin idarə heyətinin sədri Robyn Denholm bu xəbəri "tamamilə əsassız" adlandırıb. CNBC-yə görə, Tesla rəhbərliyi Musk-ın yerinə keçəcək şəxsi müəyyən etmək üçün işəgötürmə şirkətləri ilə əlaqə saxlayıb. Bu xəbərlərin ardından Robinhood platformasında gecə ticarətində Tesla səhmləri 3%-ə qədər dəyər itirib, lakin sonradan toparlanıb. Denholm, sosial media hesabında verdiyi açıqlamada, idarə heyətinin Musk-ın şirkətin inkişaf planlarını həyata keçirməsinə tam etibar etdiyini bildirib.
Bu iddialar, Tesla-nın ilin ilk rübündə gözləntiləri qarşılamayan satış və mənfəət göstəricilərini açıqlamasından sonra gündəmə gəlib. Şirkətin ümumi gəliri əvvəlki ilin eyni dövrü ilə müqayisədə 9% azalaraq 19,3 milyard dollara düşüb. Avtomobil seqmentindəki gəlirlər də 20% azalaraq 14 milyard dollara geriləyib. Bu azalmaya Model Y-nin yenilənmiş versiyası üçün istehsal xətlərində aparılan yeniləmələr, qiymət endirimləri və satış təşviqləri təsir edib. Şirkətin xalis mənfəəti isə 71% azalaraq 409 milyon dollar təşkil edib. Musk, may ayından etibarən həftədə "bir və ya iki gün" Tesla-da çalışacağını və qalan vaxtını yeni "Dövlət Səmərəliliyi Departamenti" adlı layihəyə ayıracağını bildirib. Bu açıqlama investorlar arasında qeyri-müəyyənlik yaradıb. Tesla səhmləri ilin əvvəlindən bəri 30%-dən çox dəyər itirib.
Son olaraq, Tesla-nın gələcəyi və Elon Musk-ın şirkətdəki rolu ilə bağlı suallar hələ də cavabsız qalır. Şirkətin maliyyə göstəriciləri və Musk-ın yeni layihəsi ilə bağlı planları investorların diqqət mərkəzindədir.
Fərid Əlizadə