Bir ay ərzində İtalyan qəzetinin bütün məzmununu yazan süni intellekt "gələcək jurnalistlərə məxsus olacaq" deyir.
Redaksiya İtaliya mətbuatına istinadən xəbər verir ki, "Il Foglio" qəzetinin redaktoru Klaudio Kerasa, bir ay ərzində bütün məzmunu süni intellektə (Sİ) hazırlatdırdıqları təcrübənin Sİ-nin jurnalistlərin işini tamamlayacağını və bəzən daha ironik edəcəyini göstərdiyini bildirib.
İtaliyanın gündəlik milli qəzetlərindən olan "Il Foglio", "Foglio AI" adlı dörd səhifəlik nömrəsində xəbərlər, mədəniyyət, rəylər və Sİ tərəfindən idarə olunan müzakirələr də daxil olmaqla 22-dən çox məqalə yayımlayıb. Son səhifədə siyasət, iqtisadiyyat və redaktora yazılan məktublara Sİ cavabları yer alıb.
18 mart tarixli təqdimat yazısında Kerasa, jurnalistlərin yalnız sual verəcəyini, cavabların isə "Foglio AI"da tapılacağını qeyd edib. Komanda, Sİ-yə prezident Corca Meloninin nitqini xülasə etmək və baş nazirin müavini Matteo Salvininiyə göndərilən şifrəli mesajları tapmaq kimi tapşırıqlar verib.
Kerasa, təcrübənin uğurlu olduğunu və qəzetin həftədə bir dəfə nəşrə davam edəcəyini, Sİ-nin "ara-sıra" məqalələrlə inteqrasiya olunacağını bildirib. Süni zəka, podkastlar, bülletenlər, kitablar və atelyelər kimi digər layihələrdə də iştirak edəcək.
Kerasa, Sİ-nin redaksiya heyətinin bir hissəsi kimi olduğunu deyib. O, Sİ-nin ironik və ya saygısız olmasını gözləmədiyini, lakin üslub, ton və məqsədə uyğun yazmağı öyrəndiyini vurğulayıb. Eyni zamanda, Sİ-nin xəbər hazırlamaq, müsahibə almaq və dünyanı unikal baxış bucağı ilə müşahidə etmək kimi bacarıqlarda çatışmazlıqlarının olduğunu qeyd edib.
Sİ özü də müsahibə almaq bacarığının olmadığını qəbul edib. Kerasa, təcrübənin təbii və süni zəka arasındakı əlaqəni anlamağa kömək etdiyini və Sİ-nin jurnalistlərin işinin tamamlayıcısı olduğunu bildirib. Sİ də gələcəyin jurnalistlərə məxsus olacağını qeyd edib.
Fərid Əlizadə