Süni intellekt texnologiyalarının elmi fəaliyyətə təsiri ilə bağlı aparılan genişmiqyaslı təhlil paradoksal nəticələri üzə çıxarıb. Tədqiqatçılar qeyd edirlər ki, süni intellekt alətlərindən istifadə edən alimlərin fərdi karyera inkişafı sürətlənir, lakin bu proses ümumi elmi müxtəlifliyə mənfi təsir göstərir.
Redaksiya xəbər verir ki, Nature nəşrində dərc olunmuş 41,3 milyon elmi məqalənin təhlili süni intellektdən istifadə edən alimlərin həm nəşr sayına, həm də sitat göstəricilərinə görə əhəmiyyətli üstünlük qazandığını göstərib. Bu alimlər orta hesabla həmkarlarından üç dəfə çox məqalə dərc edir və təxminən beş dəfə artıq sitat alırlar.
Araşdırmaya əsasən, süni intellektdən aktiv istifadə edən tədqiqatçılar layihə rəhbəri statusuna da daha tez yüksəlirlər. Statistik göstəricilər onların bu mərhələyə orta hesabla bir il yarım daha erkən çatdıqlarını ortaya qoyur ki, bu da akademik karyerada ciddi üstünlük hesab olunur.
Lakin təhlil göstərir ki, bu müsbət fərdi nəticələr elmin ümumi inkişafı baxımından risklər yaradır. Süni intellektin kütləvi tətbiqi qlobal elmi mövzuların müxtəlifliyinin 4,6 faiz azalmasına, alimlər arasında peşəkar qarşılıqlı əlaqələrin isə 22 faiz zəifləməsinə səbəb olub.
Mütəxəssislər bildirirlər ki, alqoritmlər daha çox mövcud və artıq tədqiq olunmuş sahələrdə proseslərin avtomatlaşdırılmasına və təkmilləşdirilməsinə yönəldilir. Bu isə yeni elmi istiqamətlərin yaranmasını stimullaşdırmaq əvəzinə, tədqiqatların əsasən mövcud bilik çərçivəsində qalmasına gətirib çıxarır.