Səudiyyə Ərəbistanının vəliəhdi və Baş naziri Məhəmməd bin Salman ölkəsinin istənilən mənbədən qaynaqlanan təhlükələrə qarşı mübarizə aparmaq və onların qarşısını almaq üçün kifayət qədər güclü insan və hərbi resurslara malik olduğunu bildirib. Açıqlama regionda təhlükəsizlik risklərinin artdığı bir dövrdə səsləndirilib.
Redaksiya xəbər verir ki, Məhəmməd bin Salman Səudiyyə Ərəbistanının müdafiə imkanlarının yüksək səviyyədə olduğunu vurğulayıb. Onun sözlərinə görə, ölkə malik olduğu insan kapitalı və hərbi potensial hesabına qarşılaşa biləcəyi təhdidləri tam şəkildə çəkindirmək və zərərsizləşdirmək imkanına sahibdir.
Son həftələrdə Səudiyyə Ərəbistanı regiondakı təhlükəsizlik əməkdaşlığını genişləndirib. Riyad Türkiyə və Pakistanla hərbi koordinasiya, kəşfiyyat mübadiləsi və müdafiə imkanlarının inteqrasiyası məsələlərini müzakirə edib. Eyni zamanda Səudiyyə rəhbərliyi Körfəz ölkələri ilə regional təhlükəsizlik üzrə diplomatik təmaslarını intensivləşdirib.
Məhəmməd bin Salmanın açıqlaması Yaxın Şərqdə raket və dron hücumları, dəniz yollarının təhlükəsizliyi və regional qarşıdurmalar fonunda Səudiyyə Ərəbistanının çəkindirmə imkanlarını gücləndirməyə çalışdığı bir vaxta təsadüf edir.